អាល្លឺម៉ង់៖ យោងតាមរបាយការណ៍របស់កាសែត Bild ក្លិបតោខៀវ Chelsea មានចំណាប់អារម្មណ៍ក្នុងការចុះកុងត្រាយកអ្នកចាំទីដៃទី១របស់ក្រុម Bayern Munich កីឡាករ Manuel Neuer។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សអ្នកចាត់ការទូទៅរបស់ Cheslea លោក Frank Lampard ត្រូវបានគេរាយការណ៍មកថា កំពុងស្វែងរកអ្នកចាំទីថ្មី ប៉ុន្តែការផ្ទេរយកបានលុះត្រាណាតែក្លិបអាចបញ្ចេញកីឡាករ Kepa Arrizabalaga ជាមុនសិន។
Kepa បានទទួលរងការរិះគន់ច្រើន ពីសំណាក់គ្រូបង្វឹកសញ្ជាតិអង់គ្លេស ដោយសារបញ្ហាធ្លាក់ទម្រង់លេង និងការបង្កកំហុសជារឿយៗ កំឡុងពេលប្រកួតក្នុងរដូវកាលនេះ។ ជាក់ស្ដែងកាលពីខែកុម្ភៈកន្លងទៅ លោក Lampard បានទម្លាក់អ្នកចាំទីតម្លៃថ្លៃជាងគេប្រចាំក្លិប Chelsea រូបនេះ ឲ្យអង្គុយកៅអីបម្រុងរហូតដល់ទៅ៤ប្រកួតឯណោះ។
តាមរយៈប្រភពខាងលើបានឲ្យដឹងទៀតថា Lampard បានសម្លឹងឃើញអ្នកចាំទីជម្រើសជាតិអាល្លឺម៉ង់ Neuer ដែលជាបេក្ខភាព អាចមកជំនួស Kepa ខណៈកិច្ចសន្យារបស់កីឡាករវ័យ៣៣ឆ្នាំ នឹងផុតកំណត់ជាមួយ Bayern នៅឆ្នាំ២០២១ ហើយសម្រាប់ការចរចាបន្តកុងត្រាថ្មីនៅមិនទាន់កើតឡើងនៅឡើយទេ។
យ៉ាងណាមិញ Chelsea អាចនឹងមានភាគរយខ្ពស់ ក្នុងការទទួលបាន Neuer បន្ទាប់ពី Bayern ទំនងជាមិនបន្តកុងត្រាឲ្យម្ចាស់អាវលេខ១រូបនេះ ដោយផ្អែកទៅលើថាក្លិបជើងឯក Bundesliga ទើបតែផ្ទេរយកអ្នកចាំទីវ័យក្មេងរបស់ក្លិប Schalke កីឡាករ Alexander Nübel ដោយមិនមានតម្លៃខ្លួន កាលពីទីផ្សារខែមករាកន្លងទៅ។ ទន្ទឹមនឹងនេះ Nubel នឹងបង្ហាញខ្លួនជាផ្លូវការឲ្យ Bayern នៅខែកក្កដាខាងមុខ៕
ប្រភព៖ onefootball