កាប៊ុល៖ ក្រុមអាជ្ញាធរបាននិយាយកាលពីថ្ងៃព្រហស្បតិ៍ថា ប្រទេសអាហ្វកានីស្ថាននឹងដោះលែងអ្នកទោស ដែលមានអាយុលើសពី ៥៥ ឆ្នាំ ចំនួន១ម៉ឺននាក់ ដើម្បីកាត់បន្ថយការឆ្លងរាលដាលនៃជំងឺកូវីត-១៩។ នេះបើយោងតាមការផ្សាយរបស់ទីភ្នាក់ងារសារព័ត៌មាន Reuters ថ្ងៃទី ២៧ ខែ មីនា ឆ្នាំ ២០២០ ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស
ការិយាល័យអ្នកនាំពាក្យរបស់លោកប្រធានាធិបតី Ashraf Ghani បានឱ្យដឹងថា៖
ប្រធានាធិបតីបានចេញក្រឹត្យមួយ ដែលតម្រូវឱ្យដោះលែងអ្នកទោសរាប់ពាន់នាក់ ដោយសារតែវិបត្តិនៃជំងឺរាតត្បាតកូវីត-១៩នេះ។
មន្ត្រីរដ្ឋាភិបាលពីររូបបាននិយាយថា៖
អ្នកទោសដែលត្រូវបានដោះលែងនោះ គឺមិនរាប់បញ្ចូលសមាជិកនៃក្រុមសកម្មប្រយុទ្ធឥស្លាមតាលីបង់ ឬរដ្ឋអ៊ីស្លាមទេ ហើយដំណើរការដោះលែងនេះនឹងត្រូវបញ្ចប់ក្នុងរយៈពេល ១០ ថ្ងៃ។
អគ្គមេធាវីលោក Mohammad Farid Hamidi បាននិយាយថា៖
អ្នកទោសដែលមានបញ្ហាសុខភាពធ្ងន់ធ្ងរ ស្ត្រី កុមារ និងមនុស្សចាស់ដែលមានអាយុលើសពី ៥៥ ឆ្នាំ នឹងត្រូវបានដោះលែងដោយស្របតាមក្រឹត្យនេះ។
គួរជម្រាបផងដែរថា បើគិតមកដល់ពេលនេះ ប្រទេសអាហ្វកានីស្ថានមានអ្នកឆ្លងជំងឺកូវីត-១៩ សរុប ៩៤ នាក់ ហើយក្នុងចំណោមនោះមានអ្នកជំងឺ ៤ នាក់ បានស្លាប់បាត់បង់ជីវិត ខណៈអ្នកជំងឺចំនួន ៨៨ នាក់ផ្សេងទៀត គឺកំពុងទទួលការព្យាបាលនៅឯមន្ទីរពេទ្យ៕
Bong I.T