ក្លឹបកាំភ្លើងធំ Arsenal ដែលគ្រូធំកំពុងផ្ទុកជំងឺកូវីដ១៩ លោកមិនបាននៅស្ងៀមឡើយ គឺបានជំរុញ ឱ្យក្លឹបតាមទិញខ្សែការពារកំពុងឡើងកូដម្នាក់ដែលកំពុងលេងឱ្យក្លឹប RB Leipzig នៅលីគកំពូល អាល្លឺម៉ង់ គឺខ្សែការពារកណ្តាល Dayot Upamecano និងហាក់កំពុងតែមានភាគរយច្រើន ដើម្បីបានកីឡាកររូបនេះមករួមក្រុមផងដែរ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សទស្សនាវដ្តីកីឡារបស់អាល្លឺម៉ង់ Sport Bild បានចុះផ្សាយថា កីឡាករជម្រើសជាតិបារាំងអាយុក្រោម ២១ឆ្នាំរូបនេះ បានប្រាប់ទៅក្លឹបរបស់គេថា រូបគេចង់ចាកចេញពីក្លឹបនៅពេលរដូវកាលនេះបញ្ចប់ ខណៈដែលក្លឹបជើងឯក Premier League មាសរបស់អង់គ្លេស ក្លឹប Arsenal កំពុងតាមចែចូវរូបគេ និងធ្លាប់បានលួងលោមកីឡាករវ័យ ២១ឆ្នាំរូបនេះម្តងរួមមកហើយកាលពីរដូវកាលមុន ជំនាន់លោក Unai Emery ប៉ុន្តែមិនអាចយករូបគេបាន។
ក្លឹប RB Leipzig នឹងមិនលក់ខ្សែការពារដែលមានខ្សែស្រឡាយជាជនជាតិ Guinea-Bissau រូបនេះ ក្នុងតម្លៃថោកនោះឡើយជាមួយនឹងក្លឹបដែលបង្ហាញការចាប់អារម្មណ៍លើរូបគេ ខណៈដែលក្លឹបទាមទារតម្លៃយ៉ាងហោចណាស់ ៦៥លានដុល្លារ។
សូមបញ្ជាក់ផងដែរថា Upamecano ដែលអាចលេងក្នុងតួនាទីខ្សែបម្រើការពារផងនោះ បានចូលរួមជាមួយក្លឹប RB Leipzig ពីក្លឹបរបស់សហម្ចាស់ក្លឹប គឺក្លឹប RB Salzburg របស់អូទ្រីស កាលពីពាក់កណ្តាលរដូវកាល ២០១៦-២០១៧ ក្នុងតម្លៃត្រឹម ១២លានដុល្លារ។ រយៈពេល ៣រដូវកាលកន្លះមកនេះ រូបគេបង្ហាញខ្លួនឱ្យក្លឹប RB Leipzig សរុបចំនួន ១០៤ប្រកួត ដោយអាចរកបាន ៣គ្រាប់ និងបញ្ជូនបាលបានម្តងផងដែរ៕
ប្រភព៖ Goal