មកទល់នឹងពេលនេះ អ្នកឆ្លង COVID-19 មានការកើនឡើងដល់ជិត ១០០ ករណីហើយ។ បែបនេះហើយបានជាយើងកាន់តែប្រុងប្រយ័ត្ន និងមានវិធានការណ៍កាន់តែម៉ឺងម៉ាត់ ដើម្បីចៀសវាងការឆ្លងមកខ្លួនឯង និងក្រុមគ្រួសារ។ លោកវេជ្ជបណ្ឌិតផ្នែកទូទៅ លី ឬទ្ធីគុណ បានណែនាំវិធីការពារខ្លួនដ៏ចាំបាច់ ៤ ចំណុចដូចខាងក្រោម៖
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស១- កុំប្រើរបស់រួម
ទោះជាក្នុងផ្ទះខ្លួនឯងក៏ដោយក៏មិនត្រូវប្រើប្រាស់របស់របររួមគ្នាឡើយ ទោះជាប្ដីប្រពន្ធ ក៏គួរមិនប្រើកន្សែង ឬសម្ភារៈជាប់ខ្លួនរបស់ភាគីម្ខាងណាដែរ។ ដើម្បីកាន់តែសុវត្ថិភាពសម្ភារៈ ឬរបស់ប្រើប្រាស់ដូចជាកន្សែង សម្លៀកបំពាក់ស្លៀករួច ក៏មិនគួរទុកនៅជិតគ្នាដែរ។
២- មកពីឆ្ងាយ នៅដាច់ដោយឡែក ១៤ ថ្ងៃសិន
សម្រាប់អ្នកទើបមកពីធ្វើការនៅក្រៅប្រទេស ឬខេត្តដែលរងគ្រោះដោយ COVID-19 ពេលត្រឡប់មកផ្ទះវិញ គួរនៅដាច់ដោយឡែកពីសមាជិកគ្រួសាររយៈពេល ១៤ ថ្ងៃ សិន ដើម្បីប្រាកដថាគ្មានផ្ទុកមេរោគផ្លូវដង្ហើមមួយនោះ។
៣- ពេលទទួលទានអាហារ
អំឡុងពេលទទួលទានអាហារ ត្រូវប្រើស្លាបព្រាដួសដោយឡែកពីចានម្ហូប ដើម្បីកុំឲ្យច្រឡូកច្រឡំស្លាបព្រាម្នាក់ៗក្នុងចានម្ហូបតែមួយ។ មួយវិញទៀត បន្ទាប់ពីញ៉ាំហើយត្រូវលាងសម្អាតចាន ឆ្នាំងជាមួយសាប៊ូ បន្ទាប់មកត្រូវលាងជម្រះនឹងទឹកស្អាត។
៤- ផ្អាកការជួបជុំផ្សេងៗ
បើមិនមានការចាំបាច់ យើងកុំចេញពីផ្ទះល្អជាង ផ្អាកការផឹកស៊ី ឬជំនុំគ្នាមួយរយៈសិន ព្រោះថាបើយើងឆ្លងម្នាក់ សមាជិកគ្រួសារទាំងអស់ប្រឈមខ្ពស់ឆ្លងបន្តពីយើង។ ប្រសិនបើមានការត្រូវចេញទៅក្រៅខានមិនបាន ត្រូវពាក់ម៉ាស លាងសម្អាតដៃជាមួយសាប៊ូ ជេល ឬអាល់កុល។
៥- សម្ងំនៅផ្ទះ
អំឡុងពេលនេះការនៅក្នុងផ្ទះជាប់លាប់ជាវិធីតែមួយគត់ ដែលអាចចៀសឆ្ងាយពី COVID-19 បាន។ តែមនុស្សយើងចាំបាច់ត្រូវការញ៉ាំ ដូចនេះបើទៅផ្សារក៏មិនគួរទៅរាល់ថ្ងៃពេកដែរ គួរទិញម្ដងទុកសម្រាប់ ៣-៥ ថ្ងៃ ហើយត្រូវច្បាស់ក្នុងចិត្តថា កុំទៅជិត ឬប៉ះពាល់ ជាមួយអ្នកមានរោគសញ្ញាក្អក កណ្ដាស់។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
អត្ថបទផ្ដល់សិទ្ធិដោយ Hello Krupet