គ្នាយើងច្បាស់ជាបានដឹងហើយថាទឹកដើរតួនាទីយ៉ាងសំខាន់ក្នុងការរំលាយអាហារ របត់ឈាមរត់ ការស្រូបនូវសារធាតុចិញ្ចឹម និងការបញ្ចេញជាតិពុល។ ក្រៅពីនេះការផឹកទឹកឲ្យបានគ្រប់គ្រាន់ជារៀងរាល់ថ្ងៃជួយរក្សាមុខងារក្នុងរាងកាយឲ្យបានល្អ។ ចុះអាចមានផលល្អសម្រាប់សុខភាពស្បែកដែរឬទេ? បើមែន តើមានអ្វីខ្លះ?
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស១- ផលប៉ះពាល់អវិជ្ជមានលើស្បែកពេលខ្វះជាតិទឹក
ស្បែករបស់យើងដូចជាសរីរាង្គដទៃទៀតនៃរាងកាយដែលកើតចេញពីកោសិកា។ កោសិកាស្បែកដូចជាកោសិកាដទៃទៀតដែរដែលផ្សំពីសារធាតុទឹក។ គ្រប់សរីរាង្គទាំងអស់ត្រូវការទឹកសម្រាប់ដំណើរការបានល្អ។ នៅពេលដែលរាងកាយយើងស្រូបយកទឹកមិនបានគ្រប់គ្រាន់ នោះឈាមរបស់យើងនឹងទាញទឹកចេញពីកោសិកាស្បែក ជាលទ្ធផលធ្វើឲ្យស្បែកប្រែទៅជាស្ងួត តឹង និងជ្រួញដែលបណ្តាលមកពីការខ្វះជាតិទឹក។ ស្បែកស្ងួតគឺគ្មានភាពបត់បែន និងយឺត ហើយស្នាមជ្រួញក៏បានកកើតឡើង។
ប្រសិនបើរាងកាយយើងខ្សោះជាតិទឹករយៈពេលយូរ នោះស្បែកយើងនឹងវិវត្តកាន់តែចាស់ជាងវ័យ។ នៅពេលដែលយើងផឹកទឹកចូលក្នុងខ្លួន ទឹកនឹងទៅដល់សរីរាង្គដទៃទៀតមុនពេលទៅដល់ស្បែក។ ដូច្នេះយើងគួរតែផឹកទឹកឲ្យបានគ្រប់គ្រាន់ដើម្បីឲ្យស្បែកអ្នកអាចរក្សាទុកសារធាតុទឹកបានខ្លះ។ នៅពេលដែលស្បែកយើងមានជាតិទឹក នោះស្បែកនឹងមានភាពប្រសើរឡើង និងជៀសផុតពីភាពជ្រីវជ្រួញបាន។
២- ការថែទាំស្បែកផ្សេងទៀត
ក្រៅពីញ៉ាំទឹក យើងអាចលាបជាតិសំណើមលើស្បែករយៈពេល ២ នាទីបន្ទាប់ពីបានត្រាំទឹក ឬងូតទឹករួច។ ការធ្វើបែបនេះគឺចាំបាច់ណាស់ព្រោះបន្ទាប់ពីអ្នកត្រាំ ឬងូតទឹករួចស្បែករបស់យើងនឹងមានការស្រូបយកផលិតផលថែរក្សាស្បែកបានល្អ។ជ្រើសរើសផលិតផលដែលមានអាស៊ីត hyaluronic acid មុនពេលយើងលាបជាតិសំណើម។ ផលិតផលនេះរួមមានជែល Skinceuticals Hydrating B5។
៣- ចំណុះទឹកត្រូវញ៉ាំ
ជាទូទៅតាមការណែនាំយើងត្រូវផឹកទឹកពី ៦ ទៅ ៨ កែវក្នុងមួយថ្ងៃ ហើយកែវនីមួយៗត្រូវមានចំណុះប្រហែល ២៤០ មីល្លិលីត្រ។ ការផឹកត្រូវគ្រប់គ្រាន់អាចជួយសម្អាតជាតិពុលចេញពីរាងកាយក៏ដូចជាពីស្បែករបស់យើងផងដែរ។ វិធីមួយដើម្បីដឹងថាយើងបានផឹកទឹកគ្រប់គ្រាន់នេះគឺមើលទៅលើពណ៌ទឹកនោមរបស់យើង។ ទឹកនោមមានពណ៌លឿងស្លេកបង្ហាញថាយើងមានសុខភាពល្អ និងមានជាតិទឹកគ្រប់គ្រាន់។ ប្រសិនបើទឹកនោមយើងមានពណ៌លឿង នោះយើងចាំបាច់ត្រូវផឹកទឹកបន្ថែមទៀត។ ប្រសិនបើទឹកនោមយើងមានពណ៌ស មានន័យថាយើងបានផឹកទឹកច្រើនពេក ដែលជាហេតុធ្វើឲ្យក្រលៀនធ្វើការហួស។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
អត្ថបទផ្ដល់សិទ្ធិដោយ Hello Krupet