ក្រសួងសុខាភិបាល នាយប់ថ្ងៃអាទិត្យ ទី២២ ខែមីនានេះ បានប្រកាសពីការរកឃើញករណីឆ្លង COVID-19 ចំនួន៣១ករណីបន្ថែមទៀតនៅខេត្តព្រះសីហនុ។ ករណីទាំងនេះនាំឲ្យកម្ពុជាមានអ្នកឆ្លងសរុបចំនួន៨៤នាក់ហើយ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សជាការកត់សម្គាល់ មុនមានការជូនដំណឹងពីចំនួនករណីថ្មីនៃអ្នកឆ្លងកូវីដ១៩នាថ្ងៃអាទិត្យ ពលរដ្ឋកម្ពុជាដែលទៅធ្វើជាពលករនៅថៃ បានសម្រុកត្រលប់ចូលក្នុងស្រុកយ៉ាងច្រើនសន្ធឹក។ ការសម្រុកយ៉ាងគំហុកនេះធ្វើឡើង ក្រោយកម្ពុជា និងថៃសម្រេចបិទព្រំដែនគ្រប់ច្រកទាំងអស់ ជាបណ្តោះអាសន្នដោយសារបារម្ភពីការរាតត្បាតវីរុសកូវីដ១៩។
ស្របពេលជាមួយគ្នា គេសង្កេតឃើញ អ្នកប្រើប្រាស់បណ្តាញសង្គមមិនតិចទេ បានចេញមុខបង្ហាញនូវយោបល់ផ្សេងៗគ្នាដោយភ័យព្រួយពីការកើនឡើងនៃករណីឆ្លងវីរុសខាងលើ ព្រោះឃើញចំនួនពលរដ្ឋច្រើនកុះករត្រលប់ពីថៃចូលស្រុកខ្មែរវិញ។
តបទៅកាន់សំណួរ (comment) របស់អ្នកប្រើប្រាស់បណ្តាញសង្គមហ្វេសប៊ុកដែលបានចោទឡើងទៅកាន់ការបង្ហោះរបស់លោក លោកខៀវ កាញារីទ្ធ រដ្ឋមន្ត្រីក្រសួងព័ត៌មាន បានបញ្ជាក់នៅក្នុងគណនីហ្វេសប៊ុកផ្លូវការរបស់ខ្លួននាយប់ថ្ងៃ២២មីនា ២០២០នេះថា ក្តីបារម្ភរបស់មន្ត្រីរដ្ឋភិបាលគឺខ្លាចថា ពលរដ្ឋមួយចំនួនសំងំនៅក្នុងទីក្រុង។
លោកថា៖ «តាមមូលដ្ឋានភូមិឃុំ គាត់ក្តាប់បានថាផ្ទះណាខ្លះមានអ្នកទៅធ្វើការនៅថៃ។ ការបារម្ភរបស់យើង គឺមួយចំនួនសំងំនៅក្នុងទីក្រុង។»
លោករដ្ឋមន្ត្រីក្រសួងព័ត៌មានបន្តថា៖ «គាត់សំរុកចូលមិនព្រមកាត់ការត្រួតពិនិត្យ ហេតុនេះមានបញ្ជាទៅគ្រប់ខេត្តអោយចុះតាមមូលដ្ឋាន ដើម្បីដាក់បងប្អូនទាំងនេះដាច់ដោយឡែកពីគេ និងក្រោមការត្រួតពិនិត្យរបស់ពេទ្យចំនួន ១៤ ថ្ងៃ»។
សូមបញ្ជាក់ថា នៅថ្ងៃទី២២ ខែមីនា ឆ្នាំ២០២០នេះ ប្រជាពលរដ្ឋខ្មែរដែលបម្រើការងារនៅក្នុងប្រទេសថៃ បាននាំគ្នាសម្រុកត្រឡប់មកស្រុកកំណើតវិញ។ តាមច្រកព្រំដែននៃខេត្តជាប់ប្រទេសថៃដូចជានៅខេត្តបាត់ដំបង បន្ទាយមានជ័យ ឧត្តរមានជ័យជាដើម ត្រូវបានគេរាយការណ៍ថា មានពលរដ្ឋខ្មែរច្រើនជាងពាន់នាក់បាននាំគ្នាត្រឡប់មកស្រុកកំណើតវិញ។
ការត្រឡប់មកស្រុកយ៉ាងគំហុករបស់ប្រជាពលរដ្ឋខ្មែរ ដែលធ្វើការនៅក្នុងប្រទេសថៃនេះ នាំឱ្យមានការព្រួយបារម្ភខ្លាចពួកគេនាំមកទាំងមេរោគកូវីដ មកជាមួយ ខណៈការឆ្លងមេរោគកូវីដ១៩នៅប្រទេសថៃមានការកើនឡើង។ មកដល់ត្រឹមថ្ងៃទី២២ ខែមីនា ឆ្នាំ២០២០នេះ ប្រទេសថៃ មានអ្នកឆ្លងមេរោគកូវីដ១៩រហូតដល់ជិត ៦០០នាក់ហើយ។ ការឆ្លងនេះ មានអត្រាខ្ពស់ក្នុងរយៈពេលប៉ុន្មានថ្ងៃចុងក្រោយនេះ។
គួរំឭកថា គិតមកដល់ព្រឹកថ្ងៃ ២៣មីនានេះ កម្ពុជាមានករណីឆ្លង COVID-19 សរុប៨៤ករណី ដែលក្នុងនោះមានប្រុស៦៣នាក់ ស្រី២១នាក់។ ក្នុងចំណោមជនបរទេស បារាំងក្លាយជាចំនួនដែលច្រើនជាងគេ ហើយបន្ទាប់មកមានម៉ាឡេស៊ី និងអង់គ្លេស។
ហើយក្នុងចំណោម៨៤ករណី បរទេសមាន៥១នាក់ និងខ្មែរ៣៣នាក់។ ២ករណីហើយដែលត្រូវបានព្យាបាលសះស្បើយ ក្នុងនោះមានករណីដំបូងនៅខេត្តព្រះសីហនុ ដែលជាបុរសជនជាតិចិនពីក្រុងវូហាន និងករណីស្ត្រីអង់គ្លេសពីនាវា Viking Cruise Journey ប្រភពពីហូជីមិញ និងសំចតនៅកំពង់ចាម៕