ថ្មីៗនេះ ពលរដ្ឋកម្ពុជាដែលទៅធ្វើពលករនៅថៃ បានសម្រុកចូលក្នុងស្រុកយ៉ាងច្រើនសន្ធឹកគួរឲ្យកត់សម្គាល់។ ការសម្រុកយ៉ាងគំហុកនេះធ្វើឡើង ក្រោយកម្ពុជា និងថៃសម្រេចបិទព្រំដែនគ្រប់ច្រកទាំងអស់ជាបណ្តោះអាសន្នដោយសារបារម្ភពីការរាតត្បាតវីរុសកូវីដ១៩។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សសង្កេតឃើញបែបនេះ អ្នកប្រើប្រាស់បណ្តាញសង្គមមិនតិចទេ បានបង្ហាញនូវយោបល់ផ្សេងៗគ្នាទាក់ទិននឹងបញ្ហាប្រឈមនានា។
«គាត់សំរុកចូលមិនព្រមកាត់ការត្រួតពិនិត្យ ហេតុនេះមានបញ្ជាទៅគ្រប់ខេត្តអោយចុះតាមមូលដ្ឋាន ដើម្បីដាក់បងប្អូនទាំងនេះដាច់ដោយឡែកពីគេ និងក្រោមការត្រួតពិនិត្យរបស់ពេទ្យចំនួន ១៤ ថ្ងៃ»។
នេះជាសារឆ្លើយតបពីដំណោះស្រាយ (comment) របស់លោកខៀវ កាញារីទ្ធ រដ្ឋមន្ត្រីក្រសួងព័ត៌មានបានបង្ហើបនៅក្នុងគណនីហ្វេសប៊ុកផ្លូវការរបស់លោកនាថ្ងៃ២២មីនា ២០២០នេះ។ ការឆ្លើយតបបែបនេះ ធ្វើឡើងក្រោយពេលមានអ្នកប្រើប្រាស់បណ្តាញសង្គមបានចោទជាសំណួរទៅរដ្ឋមន្ត្រីរូបនេះ ថាតើអាជ្ញាធរមានវិធានការបែបណាចំពោះ អ្នកទើបមកពីថៃ?
លោកខៀវ កាញារីទ្ធបន្តថា ក្តីបារម្ភរបស់អាជ្ញាធរនោះគឺ ខ្លាចថាពលករមួយចំនួនសំងំនៅក្នុងក្រុង។ លោកថា៖ «តាមមូលដ្ឋានភូមិឃុំ គាត់ក្តាប់បានថាផ្ទះណាខ្លះមានអ្នកទៅធ្វើការនៅថៃ។ ការបារម្ភរបស់យើង គឺមួយចំនួនសំងំនៅក្នុងទីក្រុង។»
យ៉ាងណារដ្ឋមន្ត្រីរូបនេះ មានសុទិដ្ឋិនិយមថាព្រឹកថ្ងៃ២៣មីនានេះ អាជ្ញាធរនឹងអាចចាត់វិធានការបានហើយ។
«យ៉ាងយូរបំផុត ព្រឹកព្រលឹមនេះ តែខេត្តជាប់ព្រំដែនអាចធ្វើសកម្មភាពបានភ្លាម។»
សូមបញ្ជាក់ថា ក្រសួងសុខាភិបាល នាយប់ថ្ងៃអាទិត្យ ទី២២ ខែមីនា នេះ បានប្រកាសពីការរកឃើញករណីឆ្លង COVID-19 ចំនួន៣១ករណីបន្ថែមទៀតនៅខេត្តព្រះសីហនុ។ ករណីទាំងនេះនាំឲ្យកម្ពុជាមានអ្នកឆ្លងសរុបចំនួន៨៤នាក់ហើយ។
ហើយក្នុងចំណោម៨៤ករណី បរទេសមាន៥១នាក់ និងខ្មែរ៣៣នាក់។ ២ករណីហើយដែលត្រូវបានព្យាបាលសះស្បើយ ក្នុងនោះមានករណីដំបូងនៅខេត្តព្រះសីហនុ ដែលជាបុរសជនជាតិចិនពីក្រុងវូហាន និងករណីស្ត្រីអង់គ្លេសពីនាវា Viking Cruise Journey ប្រភពពីហូជីមិញ និងសំចតនៅកំពង់ចាម៕