ថ្លៃគួរសម! Inter ប្រាប់ Barca ថាអត់យកកីឡាករជាការដោះដូរទេ តែបើចង់បាន Martinez ត្រូវចំណាយលុយសុទ្ធរហូតដល់ទៅ…

អ៊ីតាលី៖ ក្លិបយក្សអ៊ីតាលី ​Inter Milan ត្រូវបានគេរាយការណ៍ថា នឹងមិនទទួលសំណើក្រោម១២០លានដុល្លារដាច់ខាតពី Barcelona ប្រសិនបើពួកគេចង់បានខ្សែប្រយុទ្ធឆ្នើម Lautaro Martinez។

យោងតាមការបញ្ជាក់របស់កាសែត Sport ក្លិប Inter នឹងទទួលតែលុយសុទ្ធពី Barca ប៉ុណ្ណោះ ដោយពួកគេមិនត្រូវការឲ្យក្លិបយក្សនៅតំបន់កាតាឡាន់ដាក់កីឡាករក្នុងកិច្ចព្រមព្រៀង ជាថ្នូរដោះដូរយក Martinez នោះទេ។

របាយការណ៍កាលពីពេលថ្មីៗ បានអះអាងថា Barca គ្រោងដាក់ខ្សែបម្រើ Arturo Vidal ដែលជាសំណព្វចិត្តរបស់លោក Antonio Conte កាលនៅ Juventus ក្នុងកិច្ចព្រមព្រៀង បូករួមជាមួយលុយសុទ្ធមួយចំនួន ផ្ទេរយកខ្សែប្រយុទ្ធសញ្ជាតិអាហ្សង់ទីនទៅកាន់កីឡដ្ឋាន Camp Nou។ យ៉ាងណាមិញ សំណើនេះ ត្រូវបាន Inter បដិសេធ ដោយពួកគេទាមទារចង់បានតម្លៃ១២០លានដុល្លារពី Barca ដែលជាតម្លៃទិញផ្ដាច់កុងត្រារបស់​ Martinez ។

គួរឲ្យដឹងដែរថា ក្នុងរដូវកាលនេះ ខ្សែប្រយុទ្ធវ័យ២២ឆ្នាំ នៅតែបន្តទម្រង់លេងបានល្អ ពោលក្នុងចំណោមការបង្ហាញខ្លួន៣១ប្រកួត គេរកបានបាន១៦គ្រាប់ហើយ និងបញ្ជូនបាលឲ្យមិត្តរួមក្រុមបញ្ចប់ទីបាន៤ដង គិតរាល់ព្រឹត្តិការណ៍ទាំងអស់៕

ប្រភព៖ beinsports