តោះ! មកស្គាល់ក្លឹបរងគ្រោះទាំង ៥ ដែល Messi ទំលុះសំណាញ់ទីបានច្រើនគ្រាប់បំផុត

Lionel Messi គឺជាអ្នកបំបែកឯតទគ្គកម្មរកគ្រាប់បាល់ គាត់បានរកគ្រាប់បាល់ចំនួន ៧០៣គ្រាប់ នៅក្នុងអាជីពរបស់គាត់ ដែលភាគច្រើនជាគ្រាប់បាល់ដែលរកបានជាមួយ Barcelona  ហើយខាងក្រោមនេះជាក្លឹបចំនួន ៥ ដែល Messi បានរកគ្រាប់បាល់បានច្រើនជាងគេ៖ 

១. Sevilla (៣៧គ្រាប់)

តារាឆ្នើមសញ្ជាតិអាហ្សង់ទីន Lionel Messi បានចូលរួមប្រកួតបាន៣០ប្រកួតទល់នឹង Sevilla ដោយបានទំលុះសំណាញ់ទីបាន៣៧គ្រាប់ ដែលគ្រាប់បាល់ចុងក្រោយរកបានក្នុងជ័យជម្នះ ៤-០ កាលពីខែតុលា ឆ្នាំ២០១៩ ខណៈដែលគ្រាប់បាល់ដំបូងរបស់ Messi លើក្លឹបនេះគឺ កាលពីជ័យជម្នះ ៣-១ កាលពីខែតុលា ឆ្នាំ២០០៦ កន្លងទៅ។

២. Atlético (៣១គ្រាប់)

ក្លឹប Atletico Madrid ជាក្លឹបលំដាប់ទី២ដែល Messi បានជួបច្រើនជាងគេបំផុតក្នុងអាជីពរបស់ខ្លួន និងធ្លាប់រកគ្រាប់បាល់ សរុប៣១គ្រាប់លើក្លឹបមួយនេះ ដែលគ្រាប់បាល់ដំបូងរបស់ Messi គឺក្នុងជំនួបជ័យជម្នះ ៦-០ កាលពីឆ្នាំ២០០៧ ដែលកាលនោះ Messi រកបាន២គ្រាប់ម្នាក់​ឯង។

៣. Valencia (២៨គ្រាប់)

Messi រកបាន ២៨ គ្រាប់លើក្លឹបនេះ ដែលគ្រាប់បាល់ដំបូង Messi រកបានក្នុងជំនួបជ័យជម្នះ ៦-០ កាលពីឆ្នាំ២០០៨។ Messi ធ្លាប់រកបាន Hat-tricks ៣ដងទល់នឹងក្លឹបនេះ ហើយរកបាន ១ប្រកួត ៤គ្រាប់ម្នាក់ឯងក៏មានដែរ។

៤. Real Madrid (២៧គ្រាប់)

Barcelona និង Real Madrid គឺជាក្រុមគូសត្រូវរាប់ឆ្នាំមកហើយ ខណៈដែល​ Real Madrid គឺជាក្លឹបទី១ដែល Messi បានជួបប្រកួតច្រើនជាងគេ ដោយរកបានគ្រាប់បាល់ចំនួន ២៧គ្រាប់ និងធ្លាប់បានរកគ្រាប់បាល់ Hat Tricks ២ដងលើក្លឹបយក្សមួយនេះ។

៥. Espanyol (២៥គ្រាប់)

ក្លឹប Barcelona មិនដែលទទួលបរាជ័យឡើយទល់នឹងក្រុមមួយនេះនៅពេលដែល Messi រកបានគ្រាប់បាល់ ដែលធ្វើឲ្យ Messi រកបាន២៥គ្រាប់លើក្លឹបមួយនេះ ដែលគ្រាប់បាល់ចុងក្រោយបង្អស់នោះគឺក្នុងជំនួបជ័យជម្នះ ២-០ កាលពីខែមីនា ឆ្នាំ២០១៩ កន្លងទៅ៕

ប្រភព៖ besoccer