ក្តីស្រមៃចង់បានកីឡាករជើងស៊ុតទាំង២នេះ អាចជា​រឿងមិន​ងាយ​​ស្រួលទេសម្រេាប់ Real Madrid

អេស្ប៉ាញ ៖ តារាឆ្នើមវ័យក្មេងទាំង២ Kylian Mbappe និង Erling Haaland កំពុងស្ថិតក្នុងផ្ទាំង​សុីប​របស់​ក្លឹបយក្សស Real Madrid ក្នុងការយកមករាប់រងតំបន់ប្រយុទ្ធ ។

Mbappe គឺជាគោលដៅធំរបស់ក្លឹបមួយនេះ ប៉ុន្តែបើយោងតាមស្ថានភាពកុងត្រារបស់កីឡាកររូបនេះនៅ PSG រូបគេនឹងមិនអាចលក់ចេញបានទេ រហូតដល់ឆ្នាំ២០២១ ឯណោះ ។

ចំណែក Haaland របស់ Dortmund ឯណោះវិញកំពុងធ្វើព្យុះភ្លៀងខ្លាំងក្នុងរដូវកាលដំបូងរបស់ខ្លួនជាមួយក្លឹបថ្មី ខណៈដែលមានតំលៃខ្លួនត្រឹម៧៥លានអុឺរ៉ូប៉ុណ្ណោះ តែទោះជាយ៉ាងណា Dortmund នឹងមិនព្រមវៃចេញគ្រាប់ពេជ្រ​ដែលទើបនឹងសម្រឹងសម្រាំងបានដោយងាយៗនោះទេ ។

ការទិញកីឡាករទាំង២នេះចូលក្លឹបអាចជារឿងពិបាកមួយរបស់ Real ក្នុងការយកមកកែលំអតំបន់ប្រយុទ្ធ ខណៈដែលកីឡាករទាំង២កំពុងតែស្ថិតក្នុងបេះដូងរបស់គ្រូបង្វឹកពួកគេរៀងៗខ្លួន ហើយមួយវិញទៀតការដែល​យកកីឡាករទាំង២ឲ្យមកប្រគាកស្មាគ្នានៅតំបន់ប្រយុទ្ធក៏ពិបាកដែរ ត្បិតអីគេទាំង២ក៏ហាក់មិនត្រូវគ្នាប៉ុន្មានដែរ​ ដោយកាលពីថ្មីៗនេះ Mbappe ក៏ដូចជាមិត្តរួមក្រុមនៅ PSG បានបង្ហោះវីដេអូធ្វើ Style អបអរឌឺដងចំៗដល់ Haaland ទៀត ក្រោយ PSG ទំលាក់ Dortmund ចេញពី Champion League ៕

ប្រភព៖ marca