ហង្សក្រហម គ្រោងវៃចេញកីឡាករឈុតធំ ៤រូប ដើម្បីទុកចន្លោះសម្រាប់កីឡាករថ្មី

ខ្សែបម្រើប្រយុទ្ធជម្រើសជាតិស្វីស Xherdan Shaqiri, ខ្សែការពារជម្រើសជាតិក្រូអាត Dejan Lovren, ខ្សែការពារអន្តរជាតិអង់គ្លេស Nathaniel Clyne និងខ្សែបម្រើអន្តរជាតិអង់គ្លេស Adam Lallana អាចនឹងត្រូវបានអនុញ្ញាតឱ្យចាកចេញក្រោយបញ្ចប់រដូវកាលនេះ។

យោងតាម Liverpool Echo ក្លឹបហង្សក្រហម Liverpool បានត្រៀមខ្លួនរួចរាល់ដោយគ្មានកីឡាករ ទាំងបួនរូបខាងលើដោយពួកគេអាចចាកចេញដោយមិនមានតម្លៃខ្លួនក្រោយកិច្ចសន្យារបស់ពួកគេបញ្ចប់ និងទុកកៅអីសម្រាប់ក្លឹបនាំចូលកីឡាករថ្មីផងដែរ។

សូមជម្រាបផងដែរថា Shaqiri ត្រូវបានក្លឹប Liverpool ទិញពីក្លឹប Stoke City កាលពីដើមរដូវកាល ២០១៨-២០១៩ ក្នុងតម្លៃ ១៤.៧ លានផោន ជាមួយកុងត្រាដល់ចប់រដូវកាល ២០២២ -២០២៣។ ចំណែកកីឡាករ បីរូបផ្សេងទៀត ត្រូវបានក្លឹប Liverpool ទិញពីក្លឹប Southampton ទាំងបីតែម្តង រួមមាន កីឡាករ Dejan Lovren ក្នុងតម្លៃ ២៥.៣ លានផោន កាលពីដើមរដូវកាល ២០១៤-២០១៥ និងចប់កុងត្រានារដូវកាលក្រោយ ស្របពេល Nathaniel Clyne បានមកដល់ Liverpool នៅរដូវកាលបន្ទាប់ ក្នុងតម្លៃ ១៧.៧លានផោន ដែលកុងត្រានឹងអស់សុពលភាពក្រោយចប់រដូវកាលនេះ។

អតីតប្រធានក្រុម Southampton កីឡាករ Adam Lallana បានចូលរួមជាមួយ Liverpool កាលពីដើមរដូវកាល ២០១៤-២០១៥ ក្នុងតម្លៃ ៣១ លានផោន ខណៈកុងត្រានឹងបញ្ចប់នៅរដូវកាលនេះ ស្របពេលដែលលោក Jürgen Klopp អ្នកចាត់ការ Liverpool ក៏មានគម្រោងបន្តកិច្ចសន្យាសម្រាប់ Lallana ប៉ុន្តែរូបគេបានបដិសេធ ហើយអាចនឹងត្រលប់ចូលរួមជាមួយក្លឹបចាស់ Southampton វិញផងដែរ៕

ប្រភព៖ Goal