សេអ៊ូល៖ យោងតាមការបញ្ជាក់របស់យោធាកូរ៉េខាងត្បូងបានឱ្យដឹងថា កូរ៉េខាងជើងបានបាញ់គ្រាប់ផ្លោងចំនួន ៣ គ្រាប់សំដៅទៅសមុទ្រខាងកើតនៅព្រឹកថ្ងៃច័ន្ទនេះ ខណៈកាលពីសប្តាហ៍មុន ប្រទេសនេះក៏បានបាញ់គ្រាប់ផ្លោងចំនួន ២ គ្រាប់សំដៅទៅសមុទ្រខាងកើតផងដែរ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស
ក្រសួងការពារជាតិកូរ៉េខាងត្បូងបានសរសេររៀបរាប់ថា៖
ក្រុមយោធារបស់យើងបានឃើញគ្រាប់ផ្លោងចំនួន ៣ គ្រាប់ ដែលត្រូវបានគេបាញ់ចេញនៅព្រឹកនេះពីតំបន់ Sondok នៅក្នុងខេត្ត Hamgyong ឆ្ពោះទៅសមុទ្រខាងកើត។ ហើយក្នុងនោះយើងក៏មិនទាន់ដឹងច្បាស់ថា គ្រាប់ផ្លោងដែលបានបាញ់ចេញនោះជាប្រភេទអ្វីនោះទេ។ ស្របពេលជាមួយគ្នានេះដែរ យោធាកូរ៉េខាងត្បូងក៏បាននឹងកំពុងតាមដានសកម្មភាពរបស់ប្រទេសកូរ៉េខាងជើងបន្ថែម ហើយក៏ត្រៀមខ្លួនរួចជាស្រេច ដើម្បីទប់ទល់ក្នុងករណីកូរ៉េខាងជើងបាញ់គ្រាប់ផ្លោងបន្ថែមទៀត។
នាយសេនាធិការចម្រុះបាននិយាយថា គ្រាប់ផ្លោងទាំងនោះ គឺទំនងជាផ្នែកមួយនៃសមយុទ្ធយោធារបស់កូរ៉េខាងជើង ដែលគេបានត្រៀមទុកសម្រាប់សមយុទ្ធនៅរដូវរងារបស់ខ្លួន។
គួររម្លឹកផងដែរថា កាលពីឆ្នាំមុនប្រទេសកូរ៉េខាងជើងបានបាញ់សាកល្បងមីស៊ីលនិងគ្រាប់ផ្លោងចំនួន ១៣ លើក ចំពេលដែលកិច្ចចរចាការរំសាយអាវុធនុយក្លេអ៊ែររវៀងប្រទេសនេះជាមួយសហរដ្ឋអាមេរិក បានឈានដល់ដំណាក់កាលជាប់គាំង៕
Bong I.T