ស្រ្តីរួមចំណែកជាច្រើនក្នុងការធ្វើឱ្យពិភពលោកដែលយើងរស់នៅនេះមានការប្រសើរឡើង។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សខាងក្រោមនេះជាការបង្កើតថ្មីដ៏សំខាន់ទាំង ១០ របស់ស្ត្រី៖
១០. ផ្លិតជូតកញ្ចក់
ឧបករណ៍ដែលមិនអាចខ្វះបាននេះ មានតួនាទីធ្វើឱ្យអ្នកបើកបរងាយស្រួលមើលផ្លូវ ហើយត្រូវបានបង្កើតនិងដាក់អាជ្ញាប័ណ្ណដោយលោកស្រី Mary Anderson នៅឆ្នាំ ១៩០៣ បន្ទាប់ពីលោកស្រីមានការពិបាកនៅពេលបើកបរកណ្តាលការធ្លាក់ព្រិល ហើយយល់ដឹងពីការលំបាក និងការធ្វើឱ្យកញ្ចក់ស្អាតមានប្រយោជន៍យ៉ាងណា។
៩. ម៉ាសុីនចម្រោះកាហ្វេ
លោកស្រី Melitta Bentz ដែលជាស្ត្រីមេផ្ទះម្នាក់ គិតថាការសម្អាតក្រណាត់ចម្រោះកាហេ្វដែលប្រើហើយ ជារឿងដែលគួរឱ្យធុញទ្រាន់មែនទែន។ គាត់ក៏សម្រេចចិត្តបង្កើតរបស់ថ្មី ដោយយកកំប៉ុងដែកមួយទៅចោះរន្ធ ហើយលទ្ធផលទទួលបានពិតជាល្អមែនទែន។ លោកស្រីបានចុះអាជ្ញាប័ណ្ណនៅឆ្នាំ ១៩០៨ ហើយជំនួញរបស់លោកស្រីក៏ចាប់ផ្តើមរីកចម្រើនតាំងពីពេលនោះមក។
៨. សុឺរាំងចាក់ថ្នាំ
គិលានុបដ្ឋាយិការជនជាតិអាមេរិកម្នាក់ឈ្មោះ Letitia Mumford Geer គឺជាអ្នកបង្កើតសុឺរាំងចាក់ថ្នាំដំបូងបង្អស់នៅឆ្នាំ ១៨៩៩។ ការបង្កើតនេះ ជួយឱ្យគ្រូពេទ្យអាចធ្វើការដោយដៃមួយបាន។ ការពិតណាស់ ការបង្កើតថ្មីនេះមានសារៈសំខាន់ណាស់ក្នុងវិស័យសុខាភិបាល ហើយត្រូវបានគេយកមកប្រើប្រាស់នៅវិស័យផ្សេងទៀតផងដែររហូតមកដល់សព្វថ្ងៃ។
៧. ខោទឹកនោមដែលអាចប្តូរបាន
លោកស្រី Marion Donovan ជាអ្នកបង្កើតខោទឹកនោមមិនជ្រាបទឹកមុនគេ។ គំនិតនេះត្រូវបានកើតឡើងបន្ទាប់ពីសង្គ្រាមលោកលើកទី ២ នៅពេលដែលគាត់ផ្តោតសំខាន់ទៅលើជីវិតគ្រួសារ និងសកម្មភាពការងារផ្ទះ។ ជាមួយម៉ាសុីនដេរ និងវាំងននបន្ទប់ទឹក គាត់បានបង្កើតគម្រូដំបូងរបស់វា។ គាត់ក៏បានបង្កើតប្លាស្ទិចបិទ ជំនួសម្ជុលខ្ទាស់ផងដែរ។
៦. ម៉ាសុីនលាងចាន
លោកស្រី Josephine Cochrane បានបង្កើតម៉ាសុីនលាងចានដំបូងបង្អស់នៅឆ្នាំ ១៨៨៦។ ប៉ុន្មានឆ្នាំក្រោយមក គាត់បានទាក់ទាញចំណាប់អារម្មណ៍ពីម្ចាស់ភោជនីយដ្ឋានជាច្រើន នៅកន្លែងកំសាន្តមួយក្នុងទីក្រុង Chicago ប៉ុន្តែម៉ាសុីននេះត្រូវគេទទួលស្គាល់ថាសំខាន់នៅក្នុងកំឡុងទសវត្សរ៍ ឆ្នាំ១៩៥០ ជាទសវត្សរ៍ដែលមានប្រយោជន៍ច្រើនសម្រាប់អ្នកប្រើប្រាស់។
៥. ហ្គេម Monopoly
អ្នករចនាម៉ូត លោកស្រី Elizabeth J. Phillips គឺជាអ្នកបង្កើត ហ្គេម Monopoly ដំបូងគេ ដែលជាហ្គេមបង្ហាញអំពីដំណើរការនៃសេដ្ឋកិច្ច និងបង្ហាញថាសេដ្ឋកិច្ចបែបមូលធនមានផលប៉ះពាល់កម្រិតណា។ ហ្គេមនេះត្រូវបានដាក់អាជ្ញាប័ណ្ណនៅឆ្នាំ ១៩០៤ និងត្រូវបានលក់ដែលបានរចនាបន្ថែមដោយលោក Charles Darrow។
៤. ទូកជួយសង្គ្រោះ
លោកស្រី Maria Beasley ជាអ្នកបង្កើតទូកជួយសង្គ្រោះមុនគេបង្អស់ នៅឆ្នាំ ១៨៨០ ដែលលោកស្រីបង្កើតឡើងដោយមានទំហំធំទូលាយ មានសុវត្ថិភាព ការពារភ្លើងឆេះ និងងាយស្រួលប្រើប្រាស់។ អ្វីដែលលោកស្រីនឹកស្មានមិនដល់នោះ គឺ ទូកដែលលោកស្រីបានបង្កើត បានជួយជីវិតមនុស្សរាប់ពាន់នាក់នៅក្នុងការលិចកប៉ាល់ដ៏ល្បីបំផុត គឺ Titanic។
៣. កញ្ចក់ថ្លា
លោកស្រី Katharine Burr Blodgett គឺជាស្រ្តីទីមួយដែលបានទទួលសញ្ញាប័ត្រថ្នាក់បណ្ឌិតក្នុងរូបវិទ្យា ពីសាកលវិទ្យាល័យ Cambridge ក្នុងឆ្នាំ ១៩២៦។ ប៉ុន្មានឆ្នាំក្រោយមក លោកស្រីបានបង្កើតកញ្ចក់ថ្លាមើលមិនឃើញ (invisible glass) ដែលបានរួមចំណែកក្នុងការជួយកាមេរ៉ា មីក្រូទស្សន៍ និងឧបរកណ៍ចាក់បញ្ចាំងមានភាពងាយស្រួលជាងមុន។
២. ជាតិសសៃមាំ Kevlar
លោកស្រី Stephanie Kwolek ជាបណ្ឌិតផ្នែកគីមីវិជ្ជាម្នាក់ គឺជាអ្នកបង្កើតជាតិសសៃដ៏រឹងមាំបំផុតមួយដែលត្រូវបានគេហៅថា Kevlar។ ជាតិសសៃនេះ រឹងមាំជាងដែកដល់ទៅ ៥ ដង និងត្រូវបានប្រើសម្រាប់អាវក្រោះការពារគ្រាប់ និងផលិតផលផ្សេងទៀត។
១.បណ្តាញគ្មានខ្សែ
តារាសម្តែង និងអ្នកបង្កើត លោកស្រី Hedy Lamarr បានបង្កើតនូវបច្ចេកវិទ្យាមួយដែលត្រូវបានគេដឹងថាជាឧបករណ៍ដែលគ្មានខ្សែ (Wi-Fi’s Precursor) ដំបូងគេបង្អស់ដោយសហការជាមួយមិត្តភក្តិឈ្មោះ George Antheil ដែលជួយឱ្យមានដំណើរការក្នុងការបញ្ជាពីចម្ងាយរបស់គ្រាប់បែកនាវាមុជទឹក ក៏ដូចជាការពារពីសត្រូវ ដោយផ្លាស់ប្តូរប្រេកង់នៃសញ្ញាវិទ្យុផងដែរ៕
ប្រភព៖ Bright Side