សុទ្ធតែកីឡាករល្អៗ! Lampard ចង់លក់កីឡាករ ៨នាក់ចេញ នៅរដូវក្ដៅ ព្រោះតែហេតុផលរសើប….

អង់គ្លេស៖ អ្នកចាត់ការទូទៅរបស់ Chelsea លោក Frank Lampard កំពុងតែមានគម្រោងក្នុងការកែប្រែក្រុមជាថ្មី ដោយនឹងបញ្ចេញកីឡាករ៨នាក់ នៅទីផ្សារដោះដូរកីឡាកររដូវក្ដៅខាងមុខ នេះបើតាមការចុះផ្សាយរបស់ The Sun។

អ្នកចាំទ Kepa Arrizabelaga ដែលកំពុងតែបាត់បង់តំណែង១១នាក់គឺជាកីឡាករម្នាក់ក្នុងចំណោម៨នាក់ដែល Lampard ចង់លក់ចេញ ខណៈ៧រូបផ្សេងទៀតរួមមាន Ross Barkley, Jorginho, Marcos Alonso, Emerson, Kurt Zouma, Willian និង Pedro។

រឿងរ៉ាវនេះបានកើតឡើងក្រោយតោខៀវបានរងបរាជ័យយ៉ាងអាម៉ាសក្នុងដីខ្លួនឯងកាលពីយប់ថ្ងៃអង្គារ ក្រោយប្រកួតចាញ់ Bayern Munich ក្នុងលទ្ធផល ៣-០ វគ្គ១៦ក្រុម ជើងទីមួយ ពានរង្វាន់ Champions League។ ការចាញ់ធ្ងន់ធ្ងរបែបនេះបានធ្វើឲ្យលោក Lampard ដឹងថាកីឡាករដែលលោកមាន នៅមិនទាន់អាចប្រកួតប្រជែងជាមួយក្លិបកម្រិតកំពូលៗបាននៅឡើយ ជាពិសេសគឺការប្រជែងពាន Champions League។

ជាមួយគ្នានេះ Chelsea ក៏បានប្រកាសជាផ្លូវការក្នុងការនាំចូលខ្សែបម្រើឆ្នើមម្នាក់ពី Ajax ក្នុងតម្លៃនៃការផ្ទេរ៣៧លានផោន គឺកីឡាករ Hakim Ziyech ដោយជម្រើសជាតិម៉ារ៉ុករូបនេះនឹងផ្លាស់មកកាន់កីឡដ្ឋាន Stamford Bridge នៅទីផ្សាររដូវក្ដៅខាងមុខ។

គួរឲ្យដឹងផងដែរថា ការប្រកួតក្នុងស្រុកពានរង្វាន់ Premier League រដូវកាលនេះ​ Chelsea ក៏ធ្វើមិនសូវជាបានល្អផងដែរ ដោយកំពុងឈរនៅចំណាត់ថ្នាក់លេខ៤ប៉ុណ្ណោះ គិតត្រឹមសប្ដាហ៍ទី២៧៕

ប្រភព៖ DailyMail