គ្រូធំក្លឹប Manchester City លោក Pep Guardiola បានបញ្ជាក់រួចហើយថាកីឡាករតំបន់ប្រយុទ្ធរបស់ខ្លួន Raheem Sterling អាចចូលលេងបានហើយក្នុងការប្រកួតយប់នេះទល់នឹង Real Madrid ក្នុងវគ្គ១៦ក្រុមជើងទី១ UEFA Champion League ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សSterling ខកខានក្នុងការជួយក្រុមលេងក្នុងលីគអស់២ប្រកួតមកហើយដោយសារមានបញ្ហារបួស ខណៈដែលយប់នេះ Sterling នឹងត្រលប់មកជួយក្រុមវិញក្នុងជំនួបសំខាន់ទល់នឹង Real Madrid ក្នុងទឹកដី Santiago Bernabeu ។
លោក Pep បានថ្លែងក្នុងសន្និសីទមុនការប្រកួតថា ៖ " Raheem Sterling អាចចូលលេងបាន ហើយកីឡាកររូបនេះបានត្រៀមខ្លួនរួចហើយ ការជាសះស្បើយរបស់កីឡាករម្នាក់នេះគឺពិតជាគួរឲ្យភ្ញាក់ផ្អើល។ គ្រូពេទ្យបានប្រាប់មកយើងថា ត្រូវតែប្រុងប្រយ័ត្ន តែវាជាសញ្ញាល្អ Sterling គាត់ត្រៀមខ្លួនរួចហើយ " ។
ចំណែកខាង Real Madrid ឯណោះវិញនឹងមិនមានវត្តមានកីឡាករ Eden Hazard ក្នុងប្រកួតជើងទី១នេះឡើយ ដោយសារតែកីឡាកររូបនេះមានរបួសកជើង ដែលនឹងត្រូវសម្រាកព្យាបាលរហូតដល់ទៅ២ខែ ដែលធ្វើឲ្យលោក Pep Guardiola ហាក់មានអារម្មណ៍សោកស្តាយដែលកីឡាកររូបនេះមិនបានចូលលេង។
លោក Pep បានថ្លែងថា ៖ "វាជារឿងអាក្រក់ណាស់ដែល Hazard មិនបានចូលលេង។ ខ្ញុំធ្លាប់បានសប្បាយរីករាយជួបជុំជាមួយគាត់ក្នុងកម្មវិធីកាលដែលគាត់លេងនៅអង់គ្លេស។ នៅពេលដែលគាត់លេងអ្នកនឹងនិយាយថាគេជាកីឡាករដ៏អស្ចារ្យ ខ្ញុំសង្ឃឹមថាគាត់នឹងនៅទីនេះ(លើទីលាន) ខ្ញុំជូនពរឲ្យ Hazard ឆាប់ជា ព្រោះគាត់ជាកីឡាករដ៏សែនល្អម្នាក់" ៕
ប្រភព៖ AS