មិនច្រើនទេ! បើចង់បានខ្សែប្រយុទ្ធកំពុងឡើងកូដម្នាក់នេះ Liverpool ចំណាយប្រាក់ត្រឹមតែ ២៥លានប៉ុណ្ណោះ

អង់គ្លេស៖ ក្លិបបាល់ទាត់ហង្សក្រហម Liverpool ត្រូវបានគេរាយការណ៍មកថា បានចាប់អារម្មណ៍ជាខ្លាំងក្នុងការនាំយកខ្សែប្រយុទ្ធជួរមុខរបស់ក្លិបកំពុងឡើងជើងនៅអាល្លឺម៉ង់ RB Leipzig កីឡាករ Timo Werner មកកាន់កីឡដ្ឋាន Anfield។

ក្រោយបង្ហាញទម្រង់លេងយ៉ាងគួរឲ្យចាប់អារម្មណ៍ ក្លិបជើងឯកពានរង្វាន់ Champions League រដូវកាលមុន Liverpool បានសម្លឹងឃើញក្នុងការនាំ Werner មកពង្រឹងបន្ថែមនៅតំបន់ប្រយុទ្ធរបស់ក្រុម ខណៈនៅរដូវកាលនេះ ខ្សែប្រយុទ្ធជម្រើសជាតិអាល្លឺម៉ង់រកបាន ២៧គ្រាប់ហើយឲ្យក្លិបរបស់គេ RB Leipzig។

ចំពោះតម្លៃខ្លួនក្នុងការទិញផ្ដាច់កុងត្រារបស់កីឡាករវ័យ២៣ឆ្នាំរូបនេះវិញ គឺត្រូវបានគេដឹងថាប្រមាណ ៥១លានផោន ដែលជាតម្លៃខ្លួនមួយ Liverpool រីករាយនឹងចរចាដើម្បីនាំយក Werner នៅកំឡុងទីផ្សារដោះដូរកីឡាកររដូវក្ដៅខាងមុខ។

យ៉ាងណាមិញ បើតាមការចុះផ្សាយរបស់សារព័ត៌មាន Sport1 បានឲ្យដឹងថា Werner នឹងមានតម្លៃខ្លួនត្រឹមតែប្រមាណ ៣០លានអឺរ៉ូ (២៥លានផោន) ប៉ុណ្ណោះ សម្រាប់ក្លិបណាដែលចរចានាំយករូបគេនៅពេលចប់រដូវកាល ២០១៩-២០២០។

គួរឲ្យដឹងផងដែរថា ក្រៅពី Liverpool នៅមានក្លិបធំៗ៣ទៀតគឺ Chelsea, Bayern Munich និង Real Madrid សុទ្ធតែបានដាក់ការចាប់អារម្មណ៍ចង់បានមកលើខ្សែប្រយុទ្ធ Timo Werner៕

ប្រភព៖ SportsMole