អង់គ្លេស៖ បច្ចុប្បន្នក្លិបហង្សក្រហម Liverpool កំពុងតែជោគជ័យយ៉ាងខ្លាំងក្រោមការដឹកនាំរបស់អ្នកចាត់ការទូទៅ Jurgen Klopp។ ចូលមកកាន់តំណែងកាលពីឆ្នាំ២០១៥ បុរសញ្ជាតិអាល្លឺម៉ង់បានប្រើពេល៤ឆ្នាំ ក្នុងការជួយក្លិបមួយនេះវិវត្តន៍ខ្លួនផ្ដួល Manchester United ជាក្លិបដែលជោគជ័យបំផុតរបស់អង់គ្លេសនៅក្នុងប្រវត្តិសាស្រ្ត។

ក្រុម Liverpool

ជាមួយនឹងបញ្ហានេះ បានធ្វើឲ្យអ្នកគាំទ្រ Manchester United ជាច្រើនមិនសប្បាយចិត្តនោះទេ ក្នុងនោះក៏មានកុមារាវ័យ១០ឆ្នាំម្នាក់ពីទីក្រុង Donegal ប្រទេសអៀរឡង់ផងដែរ។

កុមារា Daragh Curley មានវ័យ១០ឆ្នាំ ជាអ្នកគាំទ្រមួយរូបរបស់បិសាចក្រហម បានធ្វើកិច្ចការស្រាវជ្រាវរបស់សាលាដោយសរសេរលិខិតមួយផ្ញើទៅអ្នកចាត់ការទូទៅរបស់ Liverpool ដោយសុំលោក Jurgen Klopp បើសិនជាអាច Liverpool គួរតែចាញ់ការប្រកួតមួយចំនួន ដើម្បីមិនអាចឈ្នះពាន Premier League នៅរដូវកាលនេះបាន។

សារដែល Dargh សរសេរ

ដោយសារតែវ័យក្មេង ដូច្នេះលិខិតដែល Daragh សរសេរមើលទៅដូចជាមិនសូវបានល្អ ដោយបង្ហាញអារម្មណ៍ពិតច្រើន និងហាក់ដូចជាកំប្លែងបន្តិច ប៉ុន្តែអ្វីដែលមិននឹកស្មានដល់ សូម្បីតែម្ចាស់សំណូមពរផ្ទាល់នោះគឺ Daragh បានទទួលការឆ្លើយតបវិញពីលោក Jurgen Klopp។

ការឆ្លើយតបរបស់អតីតអ្នកចាត់ការទូទៅ Dortmund លោក Jurgen Klopp បានសរសេររៀបរាប់យ៉ាងក្បោះក្បាយប្រាប់ទៅ Daragh វិញថាលោកបានយល់ពីបំណងដែលគេចង់បាន ប៉ុន្តែនេះគឺជាការងាររបស់លោកដែលត្រូវជួយឲ្យ Liverpool ទទួលបានជោគជ័យ ហើយលោកក៏បានកោតសរសើរចំពោះទឹកចិត្តរបស់ Daragh ទៅលើក្រុមដែលគេគាំទ្រផងដែរ។

លិខិតឆ្លើយតបរបស់លោក Klopp

ជាមួយនឹងការឆ្លើយតបបែបនេះ អតីតអ្នកចាត់ការទូទៅរបស់ Borussia Dortmund ត្រូវបានទទួលការកោតសរសើរ និងការគោរពជាច្រើនពីសំណាក់បណ្ដាអ្នកគាំទ្ររបស់ក្លិបទាំងពីរ។

គួរឲ្យដឹងផងដែរថា គិតត្រឹមសប្ដាហ៍ទី២៦ Liverpool ឈ្នះ២៥ ស្មើ១ មិនដែលចាញ់ កំពុងឈរកំពូលតារាង មាន៧៦ពិន្ទុ ដាច់២២ពិន្ទុពីក្រុមលេខ២ Manchester City ដែលមានត្រឹម៥៤ពិន្ទុប៉ុណ្ណោះ៕

ប្រភព​​​៖ FoxSportsAsia

បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected] (3) LINE, VIBER: 098282890 (4) តាមរយៈទំព័រហ្វេសប៊ុកខ្មែរឡូត https://www.facebook.com/khmerload

ចូលចិត្តផ្នែក កីទ្បា និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក chlat[email protected]

ចង់ក្លាយជាអ្នកសរសេរក្រៅម៉ោងមានប្រាក់ចំណូលសូមចុះឈ្មោះទីនេះ