អាល្លឺម៉ង់៖ ក្រុមសេះបង្កង់ Juventus ត្រូវបានគេរាយការណ៍ថា មានចំណាប់អារម្មណ៍ចង់បានខ្សែបម្រើ Corentin Tolisso ដែលគ្រោងនឹងចាកចេញពីក្លិប Bayern Munich នៅរដូវក្តៅខាងមុខ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សTolisso បានផ្លាស់ពីក្របខណ្ឌ Ligue 1 មកលេងនៅ Bundesliga កាលពីឆ្នាំ២០១៧ ក្នុងតម្លៃផ្ទេរ៣៥លានផោន បន្ទាប់ពីបង្ហាញទម្រង់លេងគួរឲ្យភ្ញាក់ផ្អើលជាមួយក្រុម Lyon។
ក្នុងរដូវកាល២០១៧/១៨ គេបង្ហាញខ្លួនបាន៤០ប្រកួត និងរួមចំណែកជួយក្រុម Bayern Munich លើកពានលីកកំពូលអាល្លឺម៉ង់។ បន្ទាប់មកក្នុងឆ្នាំ២០១៨ គេបានជួយក្រុមជម្រើសជាតិបារាំងឈ្នះពាន FIFA World Cup ថែមទៀតផង។
ប៉ុន្តែក្រោយបញ្ចប់ភារកិច្ចជាមួយក្រុមជម្រើសជាតិ គេបានជួបបញ្ហារបួសសរសៃពួរ និងសាច់ដុំធ្ងន់ធ្ងរ ជាហេតុធ្វើឲ្យគេមិនអាចរក្សាទម្រង់លេងបានល្អដូចមុន។ ជាក់ស្ដែងក្នុងរដូវកាលនេះ Tolisso មិនសូវមានឱកាសបានចូលលេងនោះទេ ដោយគេទើបបង្ហាញខ្លួនក្នុងលីក Bundesliga បាន១០ប្រកួតប៉ុណ្ណោះ។
យ៉ាងណាមិញ យោងតាមការចុះផ្សាយរបស់កាសែត Bild ក្លិបយក្សអាល្លឺម៉ង់ រៀបគម្រោងលក់ខ្សែបម្រើវ័យ២៥ឆ្នាំរូបនេះ នៅខែមិថុនាខាងមុខ ខណៈកិច្ចសន្យាបច្ចុប្បន្នរបស់គេនៅសល់រយៈពេល១ឆ្នាំទៀត។
របាយការណ៍ពី Soccerlink បានបញ្ជាក់ថាក្លឹប Juventus ស្ថិតក្នុងចំណោមក្លិបធំៗ៤ទៀតនៅអឺរ៉ុបដែលចង់បាន Tolisso ក្នុងនោះរួមមានក្លិប Atletico Madrid, Arsenal, Napoli និង Manchester United។
គួរឲ្យដឹងដែរថា Juventus ខិតជិតនឹងចុះកុងត្រាយកជម្រើសជាតិបារាំងរូបនេះមកកាន់ទឹកដី Turin ម្ដងរួចទៅហើយ មុនពេលគេផ្លាស់មកលេងនៅ Bayern។ ខណៈពេលនោះក្លិបយក្សអ៊ីតាលីត្រូវបានគេរាយការណ៍ថា បានព្រមព្រៀងលក្ខខណ្ឌផ្ទាល់ខ្លួនជាមួយកីឡាករ ប៉ុន្តែចរចាតម្លៃជាមួយក្រុម Lyon មិនត្រូវដែលជាហេតុធ្វើឲ្យការផ្ទេរនោះបរាជ័យ៕
ប្រភព៖ AF