Man UTD ចូលខ្លួនប្រជែងជាមួយ Real Madrid ស្រវាយកខ្សែការពារកំពុងឡើងជើងម្នាក់នៅ La Liga

អេស្ប៉ាញ៖ ខ្សែការពារសញ្ជាតិហ្កាណាកីឡាករ Mohammed Salisu ត្រូវបានគេរាយការណ៍ ទទួលបានការចាប់អារម្មណ៍ច្រើនពីសំណាក់ក្លិបធំៗនៅតំបន់អឺរ៉ុប បន្ទាប់ពីបង្ហាញទម្រង់លេងដ៏គួរឲ្យភ្ញាក់ផ្អើលជាមួយក្រុម Real Valladolid ក្នុងរដូវកាលនេះ។

Salisu ជាយុវជនថ្នាលរបស់ក្រុម Valladolid គេត្រូវបានក្លិបតម្លើង ឲ្យមកលេងក្នុងឈុតធំ កាលពីខែកក្កដា ឆ្នាំមុន។ លើសពីនេះទៅទៀត ចាប់តាំងពីមានឈ្មោះក្នុងឈុតធំមក ខ្សែការពារវ័យ២០ឆ្នាំតែងទទួលបានការទុកចិត្តពីសំណាក់គ្រូបង្វឹក ជាប់ឈ្មោះក្នុងជម្រើស១១នាក់ដំបូងជារឿយៗ។

Salisu ត្រូវបានគេមើលឃើញថា ជាកីឡាករសំខាន់មួយរូបប្រចាំក្រុម។ ជាក់ស្ដែងក្នុងចំណោម២៣ប្រកួតកន្លងទៅក្នុងក្របខណ្ឌ La Liga រដូវកាលនេះ គេមិនដែលអវត្តមានសូម្បីតែមួយប្រកួតឲ្យក្រុម Real Valladolid ។

យ៉ាងណាមិញ បើយោងតាមការចុះផ្សាយរបស់កាសែត​អេស្ប៉ាញ AS បានឲ្យដឹងថា ក្លិបអធិរាជស Real Madrid កំពុងតាមចែចូវយកខ្សែការពាររូបនេះ។

ក្លិប Real Valladolid បានដាក់តម្លៃទិញផ្ដាច់កុងត្រាកីឡាករ Salisu ត្រឹម១២លានអឺរ៉ូប៉ុណ្ណោះ។ ខណៈប្រភពខាងលើបានបន្ថែមទៀតថា ក្លិប Atlectico Madrid និងក្លិបបិសាចក្រហម Manchester United ក៏ចាប់ចិត្តទៅលើខ្សែការពារសញ្ជាតិហ្កាណាផងដែរ។

ប៉ុន្តែបើមើលតាមជាក់ស្ដែង ក្រុមរបស់លោក Zidane ហាក់ជាបេក្ខភាពដែលមានភាគរយខ្ពស់ជាងគេក្នុងការប្រជែងយកកីឡាករ Salisu  ពីព្រោះប្រធានក្លិប Valladolid បច្ចុប្បន្នលោក Ronaldo Nazario ជាអតីតកីឡាកររបស់ Real Madrid៕

ប្រភព៖ managingmadrid