អង់គ្លេស៖ អ្នកចាត់ការទូទៅក្រុមតោខៀវ Chelsea លោក Frank Lampard ត្រូវបានគេរាយការណ៍ថា ត្រៀមនឹងចំណាយប្រាក់រហូតដល់ទៅ១៥០លានផោន (ឬប្រមាណ១៩៤លានដុល្លារ) នៅរដូវក្ដៅខាងមុខ ដើម្បីនាំយកកីឡាករថ្មីៗមកពង្រឹងក្រុម។

  លោក Frank Lampard

កាលពីទីផ្សារដោះដូរខែមករាកន្លងទៅ Chelsea មិនបានទិញកីឡាករណាម្នាក់មកចូលរួមក្រុមនោះទេ បើទោះបីជាបម្រាមហាមឃាត់ទិញកីឡាករត្រូវបានដកចេញក៏ដោយ ជាហតុធ្វើឲ្យលោក Lampard ត្រូវបង្ខំចិត្តប្រើប្រាស់កីឡាករយុវជនមកលេងក្នុងឈុតធំ។

យ៉ាងណាមិញ យោងតាមការចុះផ្សាយរបស់កាសែត Telegraph គ្រូបង្វឹកសញ្ជាតិអង់គ្លេស គ្រោងនឹងចំណាយប្រាក់ខ្ទង់១៥០លានផោន ដើម្បីទិញកីឡាករថ្មីៗ មកចូលរួមក្រុមនៅទីផ្សារដោះដូររដូវក្ដៅខាងមុខ។ ខណៈខ្សែបម្រើក្រុម​ Dortmund កីឡាករ Jadon Sancho និងខ្សែបម្រើ Hakim Ziyech របស់ក្លិ​ប Ajax ស្ថិតក្នុងបញ្ជីកីឡាករដែលគាត់ចង់បាន។

  កីឡាករ Jadon Sancho

Sancho បានបង្ហាញទម្រង់យ៉ាងល្អបន្ទាប់ពីចាកចេញពី Man City កាលពីឆ្នាំ២០១៧។ គិតមកទល់ពេលនេះ គេបង្ហាញខ្លួនឲ្យក្រុមយក្សអាល្លឺម៉ង់បាន៨៤ប្រកួត ស៊ុតបញ្ចូលទីបាន២៩គ្រាប់ និងបញ្ជូនបាល់ឲ្យមិត្តរួមក្រុមសម្រេចទីបាន៤០ដង។

ប៉ុន្តែ Chelsea ទំនងជាត្រូវជួបគូប្រជែងធំមួយក្នុងការដណ្ដើមយកកីឡាកររូបនេះ ខណៈក្រុមបិសាចក្រហម Manchester United ត្រូវបានគេរាយការណ៍ថាក៏មានចំណាប់អារម្មណ៍ទៅលើជម្រើសជាតិអង់គ្លេសផងដែរ។

  ខ្សែបម្រើ Hakim Ziyech

ប្រភពខាងលើបន្ថែមទៀតថា​ Chelsea នឹងព្យាយាមដាក់សំណើចរចាយកខ្សែបម្រើ Ziyech សាជាថ្មីម្ដងទៀតនៅរដូវក្ដៅខាងមុខ បន្ទាប់ពីត្រូវបានក្លិប Ajax បដិសេធកាលពីទីផ្សារដោះដូរខែមករាកន្លងទៅ៕

បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected] (3) LINE, VIBER: 098282890 (4) តាមរយៈទំព័រហ្វេសប៊ុកខ្មែរឡូត https://www.facebook.com/khmerload

ចូលចិត្តផ្នែក កីទ្បា និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]

ចង់ក្លាយជាអ្នកសរសេរក្រៅម៉ោងមានប្រាក់ចំណូលសូមចុះឈ្មោះទីនេះ