ប្រេស៊ីល៖ ខ្សែបម្រើសញ្ជាតិជប៉ុន កីឡាករ Keisuke Honda ទទួលបានការស្វាគមន៍យ៉ាងកក់ក្ដៅពីសំណាក់អ្នកគាំទ្រ ជាច្រើនពាន់នាក់របស់ក្រុម Botafogo នៅព្រលានយន្តហោះ Galeão International Airport ទីក្រុង Rio de Janeiro ប្រទេសប្រេស៊ីល កាលពីយប់មិញ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សយោងតាមការបញ្ជាក់របស់សារព័ត៌មាន Channel News Asia បានឲ្យដឹងថា កីឡាករវ័យ៣៣ឆ្នាំ បានចុះកុងត្រាលេងឲ្យក្រុម Botafogo រហូតដល់បំណាច់ឆ្នាំនេះ។
យ៉ាងណាកាលពីរាត្រីថ្ងៃសុក្រម្សិលមិញ បន្ទាប់ពីលោក Honda ធ្វើដំណើរចុះពីលើយន្តហោះភ្លាម អ្នកគាំទ្រជាច្រើនបានស្រែកច្រៀង ទទួលលោកថា “Ole, Ole, Ole, Ola, Honda, Honda” ។ ខណៈពេលនោះ លោក Honda បានបង្ហាញកាយវិការគោរពទៅអ្នកគាំទ្រវិញ ដោយលោកបានញញឹមនិងលើកទង់ជ័យក្រុម Botafogo ឡើងគ្រវីទៅមក។
ប្រភពខាងលើបានបន្ថែមទៀតថា Honda នឹងបង្ហាញខ្លួនជាផ្លូវការឲ្យក្រុម Botafogo នៅកីឡដ្ឋាន Nilton Santos Stadium នាថ្ងៃសៅរ៍នេះ។ ជម្រើសជាតិជប៉ុន បានផ្ទេរមកចូលរួមជាមួយក្លិបនៅលីគប្រេស៊ីល Serie A ដោយគ្មានតម្លៃខ្លួនបន្ទាប់ពីចាកចេញពីក្រុមហូឡង់ Vitesse កាលពីចុងខែធ្នូ ឆ្នាំ២០១៩។
អតីតខ្សែបម្រើក្រុម AC Milan និង ក្រុម CSKA Moscow ត្រូវបានគេចាត់ទុកថា ជាកីឡាករដ៏ឆ្នើមមួយរូបក្នុងប្រវត្តិសាស្រ្តក្រុមជម្រើសជាតិជប៉ុន ដោយស៊ុតបញ្ចូលទីបាន៣៧គ្រាប់ ក្នុងចំណោមការបង្ហាញខ្លួន៩៨ប្រកួតឲ្យជម្រើសជាតិ។
មិនត្រឹមតែប៉ុណ្ណោះ ក្នុងឆ្នាំ២០១៨ គាត់បានជាប់ឈ្មោះកីឡាករជប៉ុនដំបូងគេបង្អស់ ដែលរកគ្រាប់បាល់បានក្នុងព្រឹត្តិការណ៍បាល់ទាត់ពិភពលោក World Cup ចំនួន៣លើកជាប់គ្នា ពោលគឺក្នុងឆ្នាំ ២០១០, ២០១៤ និង ២០១៨។
បច្ចុប្បន្ននេះ ក្រៅពីអាជីពជាកីឡាករ លោកក៏មានតួនាទីជាអ្នកចាត់ការទូទៅក្រុមជម្រើសជាតិកម្ពុជាផងដែរ៕
បើចង់ជ្រាបច្បាស់សូមទស្សនាវីដេអូខាងក្រោម៖
ប្រភព៖ channelnewsasia