អូស្ត្រាលីព្រលែងត្រីចូលបឹងមួយពាន់ក្បាល មានបំពាក់ស្លាកមាសលើព្រុយ ដើម្បីទាក់ទាញភ្ញៀវទេសចរស្ទូចយកប្រាក់រង្វាន់ ក្រោយជួបវិបត្តិភ្លើងឆេះព្រៃ

អូស្ត្រាលី៖ ត្រីចំនួនមួយពាន់ក្បាលនឹងត្រូវព្រលែងចូលទៅក្នុងបឹង Victorian ដោយត្រីនីមួយៗមានបំពាក់ស្លាកមាសស្ដើងៗនៅលើព្រុយ។ ការប្រកួតស្ទូចត្រីយកប្រាក់រង្វាន់ ត្រូវបានរៀបចំឡើងដោយអាជ្ញាធរជលផលក្នុងតំបន់ ដែលមានគោលបំណងទាក់ទាញភ្ញៀវទេសចរចូលមកកម្សាន្តវិញ ក្រោយពីជួបវិបត្តិភ្លើងឆេះព្រៃ។

ភ្ញៀវទេសចរចំនួន១០នាក់ដំបូង ដែលស្ទូចបានត្រីមានស្លាកមាសលើព្រុយ នឹងទទួលបានទឹកប្រាក់ចំនួន១ម៉ឺនដុល្លារ។ ចំណែកឯត្រីដែលនៅសេសសល់ទាំងប៉ុន្មាន ក្នុងមួយក្បាលភ្ញៀវទេសចរនឹងទទួលបានទឹកប្រាក់ចំនួន២ពាន់ដុល្លារអាមេរិក។ ត្រីទាំងអស់មានចំនួន៥ប្រភេទ ហើយសុទ្ធសឹងតែអាចយកទៅបរិភោគបាន។ 

កាលបរិច្ឆេទនៃការប្រកួតស្ទូចត្រីមិនទាន់ដឹងនៅឡើយទេ ព្រោះតំបន់មួយចំនួននៅតែកំពុងប្រឈមនូវការគំរាមកំហែងពីភ្លើងឆេះ។ យ៉ាងណាមិញ គេរំពឹងថានឹងអាចចាប់ផ្ដើមមុនថ្ងៃពិធីបុណ្យជាតិ Easter នាខែមេសាខាងមុខនេះ៕

សូមទស្សនារូបភាពខាងក្រោម៖