ហ្វីលីពីនគឺជាប្រទេសដំបូងគេបំផុត ក្រៅពីប្រទេសចិន ដែលមានមនុស្សស្លាប់ ដោយសារវីរុសកូរ៉ូណាប្រភេទថ្មី

ហ្វីលីពីន៖ បើយោងតាមទំព័រហ្វេសប៊ុកផ្លូវការរបស់អង្គការសុខភាពពិភពលោកប្រចាំប្រទេសហ្វីលីពីនបានឲ្យដឹងថា កាលពីពេលថ្មីៗនេះ បុរសជនជាតិចិនម្នាក់ នៅក្នុងប្រទេសហ្វីលីពីន ដែលមានអាយុ៤៤ឆ្នាំ​ បានស្លាប់ដោយសារវីរុស 2019-nCoV (វីរុសកូរ៉ូណាប្រភេទថ្មី)។ បើតាមក្រសួងសុខាភិបាលរបស់ហ្វីលីពីនបានឲ្យដឹងថា បុរសខាងលើបានទទួលមរណភាពនៅថ្ងៃទី១ ខែកុម្ភៈ ឆ្នាំ២០២០ ម្សិលមិញនេះ។

គួរបញ្ជាក់ផងដែរថា នេះជាករណីដំបូងគេបំផុត ក្រៅពីប្រទេសចិន ដែលមានមនុស្សស្លាប់ដោយសារវីរុសកូរ៉ូណាប្រភេទថ្មីនេះ។ នៅក្នុងប្រទេសហ្វីលីពីន ករណីនៃការឆ្លងវីរុសដ៏សាហាវថ្មីនេះមានចំនួន២ រួមមានស្ត្រីជនជាតិចិនអាយុ៣៨ឆ្នាំម្នាក់ រួមជាមួយដៃគូរបស់គាត់ដែលមានអាយុ៤៤ឆ្នាំ។

គិតមកទល់ពេលនេះ វីរុសកូរ៉ូណាប្រភេទថ្មីបានឆក់យកជីវិតមនុស្សអស់ចំនួនជាង៣០០នាក់ ហើយមានមនុស្សចំនួន១៤,៣០០នាក់ផ្សេងទៀត កំពុងមានផ្ទុកវីរុសថ្មីនេះ។ នៅក្នុងតំបន់ប្រទេសអាស៊ីគ្នេយ៍យើងនេះ​ ប្រទេសដែលបានឆ្លងវីរុសថ្មីនេះមានដូចជា កម្ពុជាចំនួន១ករណី ថៃចំនួន១៩ករណី ម៉ាឡេស៊ីចំនួន៨ករណី សិង្ហបុរីចំនួន១៣ករណី វៀតណាមចំនួន៧ករណី និងហ្វីលីពីនចំនួន២ករណី(ស្លាប់ម្នាក់)។

យ៉ាងណាមិញ ក៏នៅមានប្រទេសក្នុងតំបន់អាស៊ានរបស់យើង នៅមិនទាន់មានការបញ្ជាក់ពីការឆ្លងវីរុសកូរ៉ូណាប្រភេទថ្មីនេះនៅឡើយទេ ហើយប្រទេសទាំងនោះមានដូចជា ឥណ្ឌូនេស៊ី មីយ៉ាន់ម៉ា ឡាវ ប្រ៊ុយណេ និងទីម័រ។

គួររម្លឹកផងដែរថា វីរុសកូរ៉ូណាប្រភេទថ្មីនេះបានផ្ទុះឡើងដំបូងបំផុត នៅក្នុងទីក្រុងវូហាន នៃខេត្ត  Hubei របស់ប្រទេសចិន ហើយវីរុសដ៏កាចសាហាវមួយនេះ កំពុងបន្តរីករាលដាល និងបានសម្លាប់មនុស្សអស់ជាច្រើននាក់ផងដែរ៕