សមត្ថកិច្ចមិនខ្លាចនឹងបង្ក្រាបល្បែងស៊ីសងខុសច្បាប់នៅខេត្តព្រះសីហនុឡើយ។ នេះជាអ្វីដែលលោកឧត្តមសេនីយ៍ទោជួន ណារិន្ទ ស្នងការនគរបាលខេត្តព្រះសីហនុបានប្រាប់Khmerload នៅថ្ងៃទី២២មករានេះ។ ការឆ្លើយតបយ៉ាងមានសុទិដ្ឋិនិយមរបស់លោកស្នងការខេត្តព្រះសីហនុបែបនេះ ធ្វើឡើងក្រោយមានព័ត៌មានរិះគន់ ចំៗ ឥតសំចៃពីមជ្ឈដ្ឋានមួយចំនួនថាអាជ្ញាធរខេត្តព្រះសីហនុ ហាក់មានភាពស្ពឹកស្រពន់ រឿងបង្ក្រាបបញ្ហាល្បែង ស៊ីសងខុសច្បាប់ក្នុងខេត្តខាងលើ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សលោកជួន ណារិន្ទបន្ថែមថា៖ «បទល្មើសជាក់ស្តែង យើងមិនខ្លាចនឹងអនុវត្តន៍ច្បាប់នោះទេ។ កន្លងមកអាជ្ញាធរបានប្រឹងប្រែងធ្វើការចុះបង្ក្រាបដោយមិនខ្វល់ពីពេលវេលាសម្រាកពេលយប់ឡើយ។ មូលហេតុត្រង់ថា ល្បែងខុសច្បាប់ទាំងនោះត្រូវបានគេបើកឲ្យលេងតែពេលយប់ប៉ុណ្ណោះ ហើយពេលថ្ងៃ មិនសូវជាមានអ្នកប្រព្រឹត្តប៉ុន្មានទេ។ អ៊ឹចឹងហើយ យើងក៏ត្រូវត្រៀមចាត់ការនាពេលយប់ដែរ។»
ស្នងការនគរបាលខេត្តព្រះសីហនុរូបនេះ បានបង្ហើបថា ការបង្កា្របស្បែងស៊ីសងខុសច្បាប់នាពេលនេះ នឹងមិនធ្វើដូចភ្លើងចំប៉ើងនោះឡើយ។ លោកថា បើចង់ឲ្យការបង្ក្រាបមានប្រសិទ្ធភាពលុះត្រាតែការបង្ក្រាបនោះមានបន្តបន្ទាប់ជានិច្ច។
ឧត្តមសេនីយ៍ទោខាងលើបានបញ្ជាក់ច្បាស់ៗថា មួយរយៈចុងក្រោយនេះ ល្បែងស៊ីសងខុសច្បាប់ដែលអាជ្ញាធរចាប់បានមានដូចជាល្បែងបាញ់ត្រី និងទូរល្បែងមួយចំនួនទៀតដែលរកស៊ីខុសច្បាប់ តែស្ថិតក្រោមស្លាកល្បែងកំសាន្ត។
ជាការកត់សម្គាល់ មានមតិមិនតិចទេបានចោទសួរពីឧបសគ្គរបស់អាជ្ញាធររឿងបង្ក្រាបល្បែងខុសច្បាប់នៅក្នុងខេត្តព្រះសីហនុ ថាតើមានបញ្ហាអ្វីដែលនាំឲ្យការបង្ក្រាបមានភាពយឺតយ៉ាវ។ ជាការឆ្លើយតប លោកជួន ណារិន្ទបញ្ជាក់ថា អាជ្ញាធរមិនមានឧបសគ្គរឿងបង្កា្របរឿងល្បែងស៊ីសងខុសច្បាប់នោះឡើយ ព្រោះមានការគាំទ្រច្រើនពីស្ថាប័នពាក់ព័ន្ធ តែក៏នៅមានចន្លោះខ្វះខាតផងដែរ។
គួររំឭកថា ខេត្តព្រះសីហនុជាខេត្តមួយដែលត្រូវបានមហាជនភាគច្រើនកត់ចំណាំ និងបញ្ចេញយោបល់ជាហូរហែពីបញ្ហាល្បែងស៊ីសង ហើយថាកំណើនជនជាតិចិនចូលមកក្នុងខេត្តនេះ ជាមូលហេតុដែលធ្វើឲ្យមានកំណើនល្បែងទាំងនោះ។ តែយ៉ាងណាអាជ្ញាធរ បានចេញមុខបដិសេធ ដោយសម្អាងថា វាមិនមែនពាក់ព័ន្ធរឿងលំហូរជនជាតិចិន តែវាពាក់ព័ន្ធនឹងច្បាប់៕