អីយ៉ាសជិតយកបានកីឡាករនៅ PL ម្នាក់ទៀតហើយ! Inter ព្រមព្រៀងចុះកុងត្រាយកកីឡាករ Chelsea មួយរូបក្នុងតម្លៃ…

អ៉ីតាលី៖ ក្លិបយក្សអ៉ីតាលី Inter Milan បានព្រមព្រៀងចុះកុងត្រាយកខ្សែការពារស្លាបរបស់ក្រុមតោខៀវ Chelsea កីឡាករ Victor Moses ក្នុងលក្ខខណ្ឌខ្ចីជើង ជាមួយនឹងជម្រើសទិញផ្ដាច់១០លានអឺរ៉ូ (ឬប្រមាណ ១១លានដុល្លារ)។

Moses ត្រូវបានគេរាយការណ៍ថាបានធ្វើដំណើរទៅកាន់ទីក្រុង Milan រួចរាល់ហើយ ដោយនឹងធ្វើតេស្តសុខភាពនៅថ្ងៃអង្គារនេះ។

ជាមួយគ្នានេះដែរ នាយកផ្នែកអភិវឌ្ឍន៍កីឡារបស់ក្រុម Inter លោក Piero Ausilio បានប្រាប់កាសែត Sky Sport Italia ថាក្រុមរបស់លោកបានឈានដល់កិច្ចព្រមព្រៀងក្នុងលក្ខខណ្ឌគោលមួយចំនួន ជាមួយនឹងក្រុម​ Chelsea ហើយជុំវិញការផ្ទេរកីឡាករ Moses។

ខ្សែការពារស្លាបវ័យ២៩ឆ្នាំរូបនេះ ត្រូវបានក្រុម Chelsea ដាក់ឲ្យក្រុម Fenerbache ខ្ចីជើងកាលពីខែមករាឆ្នាំមុន ដោយបច្ចុប្បន្នក្លិបទាំងពីរបានយល់ព្រមបន្ធូរបន្ថយកិច្ចសន្យាដែលនៅសល់៥ខែទៀតនោះ ឲ្យគាត់ចាកចេញហើយ ដូច្នេះមានន័យថាគាត់អាចនឹងត្រឡប់ទៅចូលរួមជាមួយនឹងអតីតគ្រូបង្វឹក លោក Antonio Conte បាននៅទឹកដី San Siro។

យោងតាមការចុះផ្សាយរបស់កាសែត​ Sky Sports Italia បានឲ្យដឹងថា ការធ្វើតេស្តសុខភាពរបស់ជម្រើសជាតិនីហ្សេរីយ៉ារូបនេះ នឹងធ្វើឡើងនៅព្រឹកថ្ងៃអង្គារនេះវេលាម៉ោង១០ (ម៉ោងក្នុងប្រទេសអ៉ីតាលី)។

យ៉ាងណា ការធ្វើតេស្តសុខភាពនេះអាចជាកត្តារារាំងមួយសម្រាប់ Moses ផងដែរ ដោយរូបគេធ្លាប់រងរបួសធ្ងន់២ដងក្នុងរដូវកាលនេះ ខណៈលើកទី១ របួសកាលពីខែសីហា និងលើកទី២នៅដើមខែធ្នូ។

គួរឲ្យដឹងដែរថា រយៈពេល១ឆ្នាំកន្លងទៅ Moses បង្ហាញខ្លួនបាន២៣ប្រកួតប៉ុណ្ណោះឲ្យក្រុម Fenerbache ក្នុងនោះរូបគរកបាន៥គ្រាប់និងបញ្ជូនបាល់ឲ្យមិត្តរួមក្រុមស៊ុតបញ្ចូលទីបាន២ដង៕

ប្រភព៖ football-italia