ដូចមមាញឹកណាស់! ក្រោយយកបាន Young ពេលនេះ Inter ចូលខ្លួនចរចាយកកីឡាករមួយរូបទៀតពី Chelsea

អ៉ីតាលី៖ យោងតាមការចុះផ្សាយរប​ស់កាសែត​ Sky Sport Italia បានឲ្យដឹងថាក្លិប Inter Milan បានបើកកិច្ចពិភាក្សាជាផ្លូវការជាមួយក្លិបតោខៀវ Chelsea ចរចាដាក់សំណើសុំខ្ចីជើងយកខ្សែការពារស្លាបកីឡាករ Victor Moses។

ប្រភពខាងលើបាបន្ថែមទៀតថា ការទាក់ទងគ្នាជាផ្លូវការរវាងក្លិបទាំងពីរ បានធ្វើឡើងកាលពីរយៈពេលប៉ុន្មានម៉ោងមុននេះ ខណៈ Chelsea បានជូនដំណឹងប្រាប់ក្រុម Inter ថាពួកគេយល់ព្រមទទួលការចរចា ជុំវិញរឿងផ្ទេរកីឡាករ Moses ក្នុងលក្ខខណ្ឌខ្ចីជើងរយៈពេល៦ខែ ជាមួយនឹងជម្រើសទិញផ្ដាច់។

Moses បច្ចុប្បន្នកំពុងលេងឲ្យក្លិប Fernabache ដែលជាក្លិបនៅលីគកំពូលប្រទេសតួកគីក្នុងលក្ខខណ្ឌខ្ចីជើង។បើយោងតាមរបាយការណ៍បានឲ្យដឹងថាក្លិបនៅក្របខណ្ឌ SüperLig មួយនេះ នឹងមិនរារាំងខ្សែការពារសញ្ជាតិនីហ្សេរីយ៉ាផ្ទេរទៅកាន់ក្លិបអ៉ីតាលីនោះទេ។

Moses និងអ្នកចាត់ការទូទៅក្រុម​ Inter លោក Antonio Conte ធ្លាប់ធ្វើការជាមួយគ្នាម្ដងរួចទៅហើយកំឡុងពេលដែល គ្រូបង្វឹករូបនេះទទួលបន្ទុកដឹកនាំក្រុម​ Chelsea ក្នុងឆ្នាំ២០១៦។

យ៉ាងណា ខ្សែការពារស្លាបវ័យ ២៩ឆ្នាំត្រូវបានគេមើលឃើញថា អាចមានភាគរយខ្ពស់ក្នុងការទៅចូលរួមជាមួយអតីតគ្រូបង្វឹកលោក Conte ក្រោមមូលហេតុមិនសូវមានឱកាសបានបង្ហាញខ្លួនឲ្យក្រុម Fenerbache ជាក់ស្ដែងក្នុងរដូវកាលនេះ រូបគេចូលលេងទើបបាន៦ប្រកួតប៉ុណ្ណោះ។

គួរឲ្យដឹងដែរថា ក្នុងថ្ងៃនេះក្រុម Inter Milan ទើបទិញបានកីឡាករ Premier League ១រូបទៅចូលរួមក្រុម ដោយពួកគេបានសម្រចកិច្ចព្រមព្រៀងទិញយកខ្សែការពារស្លាបវ័យ៣៤ឆ្នាំរបស់ក្លិបបិសាចក្រហម Manchester United កីឡាករ Ashley Young ក្នុងតម្លៃ ១,៥លានដុល្លារ ជាមួយនឹងកុងត្រារយៈពេល៦ខែ៕

ប្រភព៖ allfootballapp