អង់គ្លេស៖ ក្រោយជួយឲ្យមេឃខៀវ Manchester City គ្រងតំណែងជើងឯក Premier League កាលពីរដូវកាលមុនលោក Pep Guardiola ទំនឹងជាលំបាកក្នុងការប្រជែងពាននៅរដូវកាលនេះ ដោយហង្សក្រហម Liverpool កំពុងតែដាច់ពិន្ទុឆ្ងាយពេក។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស
ដោយសារតែបញ្ហាថាមិនអាចការពារតំណែងជើងឯកបាននេះហើយ បានធ្វើឲ្យកើតមាននូវសម្ពាធសម្រាប់អ្នកចាត់ការទូទៅសញ្ជាតិអេស្ប៉ាញម្នាក់នេះថាអាចនឹងចាកចេញពីកីឡដ្ឋាន Etihad មុនពេលដែលកុងត្រារបស់លោកត្រូវបានបញ្ចប់នៅក្នុងឆ្នាំ២០២១។
យ៉ាងណាមិញ ថ្លែងនៅក្នុងសន្និសីទសារព័ត៌មានមុការប្រកួតជាមួយ Crystal Palace នៅយប់នេះ លោក Pep បានឲ្យដឹងអំពីរឿងរ៉ាវអនាគតរបស់លោកយ៉ាងដូច្នេះថា៖
"លុះត្រាតែក្លិបបណ្ដេញខ្ញុំ ទើបខ្ញុំចេញ បើមិនចឹងខ្ញុំនឹងនៅទីនេះ ១០០%។ គ្មានអ្នកចាត់ការមួយរូបណាដែលឈ្នះគ្រប់ពេលនោះទេ។ ខ្ញុំរីករាយជាមួយនឹងកីឡាករទាំងអស់របស់ខ្ញុំ។ ពួកយើងបានចាញ់ការប្រកួតមួយចំនួន ប៉ុន្តែវាជារឿងធម្មតាទេ ពួកយើងត្រូវខិតខំឲ្យល្អជាងនេះទៀត។"
គួរបញ្ជាក់ផងដែរថា នៅយប់នេះម៉ោង១០ Manchester City នឹងបើកទ្វារកីឡដ្ឋាន Etihad Stadium របស់ខ្លួនទទួលស្វាគមន៍ក្រុមភ្ញៀវ Crystal Palace ក្នុងការប្រកួតសប្ដាហ៍ទី២៣ ក្របខណ្ឌលីគកំពូលអង់គ្លេស Premier League៕
ប្រភព៖ BBC
Bong I.T