Inter កំពុងរៀបចំសំណើចរចារយកកូនបិសាច១រូបទៀតមកចូលរួមក្រុម

អ៉ីតាលី៖ ភ្នាក់ងារបស់ខ្សែបម្រើវ័យក្មេងកីឡាករ Tahith Chong ត្រូវបានគេរាយការណ៍ថា បានជួបជាមួយនឹងតំណាងរបស់ក្រុម​​ Inter Milan ខណៈឱកាសនៃការចាកចេញរបស់កូនបិសាចក្រហមរូបនេះ ហាក់មានកាន់តែខ្ពស់។

កុងត្រារបស់​ Chong សល់ពេលត្រឹម៦ខែទៀតប៉ុណ្ណោះ នៅទឹកដី Old Trafford ហើយបច្ចុប្បន្នគាត់មានសេរីភាពគ្រប់គ្រាន់ក្នុងការចរចាជាមួយនឹងក្លិបក្រៅស្រុក។

យោងតាមរបាយការណ៍បានឲ្យដឹងថា Man UTD មានទំនុកចិត្តខ្ពស់ក្នុងការបញ្ចុះបញ្ចូលខ្សែបម្រើវ័យ២០ឆ្នាំ ឲ្យបន្តកុងត្រាថ្មី ប៉ុន្តែភ្នាក់ងាររបស់គាត់ហាក់ចង់ឲ្យគាត់ចុះកុងត្រាជាមួយក្លិបផ្សេងទៀត។

ទន្ទឹមនឹងនេះអ្នកសារព័ត៌មានកីឡាលោក Fabrizio Romano បានសរសេររៀបរាប់លើគណនី Twitter របស់លោកថា តំណាងរបស់ក្រុម Inter Milan បានជួបពិភាក្សាជាមួយនឹងភ្នាក់ងាររបស់​ Chong ជុំវិញការផ្ទរយកកីឡាកររូបនេះទៅកាន់ទឹកដីអ៊ីតាលី។

ក្លិប Inter Milan មិនមែនជាក្លិបអ៊ីតាលីតែមួយនោះទេដែលមានចំណាប់អារម្មណ៍លើកូនបិសាចក្រហមរូបនេះ ក្នុងនោះក្រុមសេះបង្កង់ Juventus ក៏កំពុងតាមប្រមាញ់យក Chong ផងដែរ។

កាសែត Tuttosport បានចុះផ្សាយថា Juventus ខិតជិតក្នុងការចុះកុងត្រាព្រៀងទុកជាមុន (Pre- Contract) ជាមួយ Chong ដែលកិច្ចព្រមព្រៀងនេះ ស្រដៀងទៅនឹងកុងត្រាដែលធ្លាប់នាំយក Pogba មកកាន់ទីក្រុងទូរីនកាលពីឆ្នាំ២០១២។

ជាមួយគ្នានេះដែរកាសែត​ The Sun បានបញ្ជាក់ថា Juventus បានយល់ព្រមផ្ដល់ប្រាក់ពលកម្ម៣ម៉ឺន៥ពាន់ផោន (៤សែន៥ម៉ឺនដុល្លារ) ក្នុង១សប្ដាហ៍ បូករួមជាមួយនឹងប្រាក់លើកទឹកចិត្តផ្សេងៗទៀតចំនួន២លានផោន សម្រាប់​ Chong។

គួរឲ្យដឹងដែរថា កាលពីពេលថ្មីៗនេះ ប្រធានក្រុមបិសាចក្រហម Manchester United កីឡាករ Ashley Young ក៏បានយល់ព្រមលក្ខខណ្ឌផ្ទាល់ខ្លួនជាមួយនឹងក្រុម Inter Milan ផងដែរ ប៉ុន្តែខ្សែការពារស្លាបវ័យ២៤ឆ្នាំរូបនេះ មិនចាកចេញក្នុងខែមករានោះទេ ដោយរូបគេរង់ចាំរហូតដល់បញ្ចប់រដូវកាល៕

ប្រភព៖ talksport