វីវរហើយ! Barcelona ចុចឈ្មោះគ្រូបង្វឹក ដើម្បីទៅជំនួសលោក Valverde រួចស្រេច

អេស្ប៉ាញ៖ អតីតគ្រូបង្គោលរបស់ក្លិបមាន់ខ្នាយមាស Tottenham Hotspur លោក Mauricio Pochettino ត្រូវបានគេរាយការណ៍មកថាគឺជាបេក្ខភាពគ្រូបង្វឹករបស់ក្លិបអ្នកមានបុណ្យ Barcelona បន្ទាប់ពីលោក Ernesto Valverde។

អនាគតរបស់បុរសវ័យ ៥៥ឆ្នាំ Valverde ជាមួយក្លិបមានមូលដ្ឋាននៅតំបន់កាតាឡាន់កំពុងតែក្លាយជាប្រធានបទក្ដៅ ក្រោយលោកដឹកនាំក្លិបដ៏ធំរបស់ប្រទេសអេស្ប៉ាញមួយនេះមិនសូវជាទទួលលទ្ធផលជាផ្លែផ្កា។

អតីតប្រធានក្រុមរបស់ Barcelona លោក Xavi ក៏ជាបេក្ខភាពមួយរូបផងដែរដែលអាចនឹងមកទទួលតំណែងបន្តពីលោក Valverde។ យ៉ាងណាមិញ បើតាមសារព័ត៌មាន RAC1 លោក Pochettino គឺជាបេក្ខភាពសំខាន់មួយរូបដែលអាចនឹងទៅដឹកនាំក្លិបជើងឯកអេស្ប៉ាញ។

គ្រូបង្វឹកវ័យ៤៧ឆ្នាំ Pochettino ធ្លាប់ទាំងប្រកបអាជីពជាកីឡាករ និងដឹកនាំក្លិបនៅក្នុងតំបន់កាតាឡាន់ Espanyol នៅចន្លោះឆ្នាំ ២០០៩-២០១២ មុនលោកពនេចរមកដល់ទឹកដីអង់គ្លេស។

គួរឲ្យដឹងដែរថា បច្ចុប្បន្នគ្រូបង្វឹកសញ្ជាតិអាហ្សង់ទីន Maurcio Pochettino កំពុងតែនៅទំនេរពីការងារ ក្រោយត្រូវក្លិបមានមូលដ្ឋាននៅទីក្រុងឡុងដ៍ Spurs បណ្ដេញចេញពីតំណែងកាលពីខែធ្នូ ឆ្នាំ២០១៩៕

ប្រភព៖ SportsMole