អង់គ្លេស៖ ក្លិបហង្សក្រហម Liverpool កំពុងតែប្រមាញ់ជម្រើសជាតិបារាំងរបស់ក្លិបអ្នកមានបុណ្យ Barcelona កីឡាករ Ousmane Dembele នេះបើតាមសេចក្ដីរាយការណ៍។ អតីតខ្សែប្រយុទ្ធរបស់ Dortmund រូបនេះកំពុងតែស្ថិតនៅក្នុងភាពស្រពិចស្រពិលចំពោះអនាគតរបស់ខ្លួននៅកីឡដ្ឋាន Nou Camp បន្ទាប់ពីថ្នាក់ដឹកនាំរបស់ក្លិបមានគម្រោងក្នុងការនាំយកមកវិញនូវខ្សែប្រយុទ្ធ Neymar។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សបើតាមការចុះផ្សាយរបស់សារព័ត៌មាន El Desmarque អ្នកចាត់ការទូទៅរបស់ Liverpool លោក Jurgen Klopp បានចាប់អារម្មណ៍ក្នុងការនាំយក Dembele មកកាន់កីឡដ្ឋាន Anfield។ Klopp ជឿថាកីឡាករវ័យ ២២ឆ្នាំរូបនេះនឹងអាចសហការគ្នាបានល្អនៅតំបន់ខាងលើរបស់ក្រុម ដោយចាប់ដៃគូជាមួយ Mohamed Salah, Sadio Mane និង Robert Firmino។
ជាមួយគ្នានេះ Barcelona ត្រូវបានគេរាយការណ៍មកថាបានបើកភ្លើងខៀវក្នុងការលក់ Dembele ចេញបើសិនជាបានទទួលសំណើណាមួយពីក្រុមជើងឯក Champions League រដូវកាលមុន Liverpool ក្នុងតម្លៃលើស ១១១លានដុល្លារសហរដ្ឋអាមេរិក។
គួរឲ្យដឹងដែរថា Dembele បានផ្លាស់ពីក្លិបអាល្លឺម៉ង់ Borussia Dortmund មកចូលរួមជាមួយ Barcelona ក្នុងតម្លៃ ១១៦លានដុល្លារសហរដ្ឋអាមេរិក ប៉ុន្តែខ្សែប្រយុទ្ធជម្រើសជាតិបារាំងរូបនេះមិនសូវជាបានចូលលេងជាប្រចាំប៉ុន្មនាទេ ដោយសារតែបញ្ហារបួសញាំញី។
គិតមកទល់នឹងពេលនេះ Dembele រកបាន ១៩គ្រាប់ និងបញ្ជូនបាល់ឲ្យមិត្តរួមក្រុមបញ្ចប់ទីបានសម្រេច (Assists) ១៧ដង ពីការបង្ហាញខ្លួនឲ្យ Barcelona សរុបចំនួន ៧៤ប្រកួត៕