កក្រើកហើយ! អតីតម្ចាស់ពាន World Cup មួយរូប អាចនឹងផ្លាស់មកលេងឲ្យក្លិបមួយក្នុងតំបន់អាស៊ាន

អាស៊ាន៖ ម្ចាស់ក្លិបជើងឯកម៉ាឡេស៊ី Jahor Darul Ta’zim (JDT) លោក Tunku Ismail Idris បានបញ្ជាក់ឲ្យដឹងថាអតីតខ្សែប្រយុទ្ធរបស់ក្រុមជម្រើសជាតិអាល្លឺម៉ង់ Lukas Podolski មានចំណាប់អារម្មណ៍ក្នុងការមកចូលរួមជាមួយក្លិបរបស់លោក។

សេចក្ដីរាយការណ៍បានឲ្យដឹងថា JDT ខិតជិតក្នុងការនាំយកអតីតកីឡាករដែលជួយឲ្យអាល្លឺម៉ង់ឈ្នះពាន FIFA World Cup 2014 បន្ទាប់ពី Podolski បានចូលទៅ Comment ក្នុងការបង្ហោះមួយនៅលើ Instagram ផ្លូវការរបស់ JDT ដោយសរសេរថា “See you soon” ដែលមានន័យថាជួបគ្នាឆាប់ៗ។

បើតាមការចុះផ្សាយរបស់កាសែតមួយក្នុងប្រទេសម៉ាឡេស៊ី ប្រធានក្លិបរបស់ JDT បានបញ្ជាក់ថាអតីតខ្សែប្រយុទ្ធរបស់ Bayern Munich និង Arsenal រូបនេះពិតជាចាប់អារម្មណ៍ក្នុងការមកលេងនៅលីគកំពូលម៉ាឡេស៊ី Malaysia Super League ជាមួយ JDT ពិតប្រាកដមែន។

គួរឲ្យដឹងដែរថា បច្ចុប្បន្ន Poldolski កំពុងតែប្រកបអាជីពនៅក្នុងប្រទេសជប៉ុនក្របខណ្ឌ J1 League ជាមួយក្លិប VIssel Kobe ដែលក្លិបជប៉ុនមួយនេះស្ថិតនៅក្នុងពូលជាមួយគ្នាជាមួយ JDT នៅក្នុងការប្រកួតពានរង្វាន់ AFC Champions League 2020៕

ប្រភព៖ FoxSportsAsia