អូដ្ឋជាង១០០០០ក្បាលនឹងត្រូវគេសម្លាប់ចោលព្រោះផឹកទឹក​ច្រើនពេក

សត្វអូដ្ឋបូកពីរជាច្រើនក្បាលនៅអូស្ត្រាលីខាងត្បូង នឹងត្រូវគេសម្លាប់ចោល ដើម្បីកាត់បន្ថយបរិមាណទឹកដែលពួកវាផឹក ព្រោះក្នុងស្ថានភាពពេលនេះជារដូវរាំងស្ងួតដែលកំពុងខ្វះខាតទឹក។

អូដ្ឋជាង១០០០០ក្បាល នឹងត្រូវប្រហារដោយក្មាន់កាំភ្លើងអាជីពពីលើអាកាសដោយជិះលើឧទ្ធម្ភាចក្រនៅថ្ងៃពុធ។

អាចជាហេតុផលមួយទៀត ដោយសារពួកគេមានក្តីបារម្ភថា សត្វកំពុងតែបង្កឲ្យមាន​ការឡើងកំដៅផែនដី ដោយសារតែពួកវាបញ្ចេញនូវឧស្ម័នមេតាន​ស្មើនឹងមួយតោនកាបូនឌីអុកស៊ីតក្នុងមួយឆ្នាំ។

បុគ្គលិកស្ថាប័ន APYបានបញ្ជាក់ថា៖ «ពួកយើងកំពុងស្ថិតនៅក្នុងស្ថានភាពក្តៅ និងមិនទាន់មានផាសុកភាពនៅឡើយ ពីព្រោះសត្វអូដ្ឋជាច្រើនក្បាលតែងតែដើររុករានតាមរបងផ្ទះ ខ្លះចូលទៅក្នុងផ្ទះហើយឈ្មូសឈ្មុលចូលទៅរកទឹកតាមរយៈចំហាយម៉ាស៊ីនត្រជាក់។»

ចំណែកស្ថាប័ន National Feral Camel Management Plan បានអះអាងថា​ការពិតទៅចំនួនសត្វអូដ្ឋ នឹងកើនឡើងដោយឯងៗទ្វេដងជារៀងរាល់៩ឆ្នាំ។

បើទោះបីជាបែបណាក្តី មន្ទីរថាមពល និងបរិស្ថានក្នុងតំបន់ បាននិយាយថាការបំភាយឧស្ម័នពីសត្វព្រៃ មិនគួរចេះតែប៉ាន់ស្មានរួមបញ្ចូលក្នុងកម្រិតបំភាយឧស្ម័នរបស់ប្រទេសនោះទេ ព្រោះវាមិនស្ថិតនៅក្រោម​ការគ្រប់គ្រងក្នុងស្រុកឡើយ៕