អង់គ្លេស៖ ក្រុមហង្សក្រហម Liverpool ក្នុងនាមជាម្ចាស់ផ្ទះបានបើកទ្វារកីឡដ្ឋាន Anfield ទទួលស្វាគមន៍ក្រុមភ្ញៀវស្ករគ្រាប់ Everton ក្នុងការប្រកួតពានរង្វាន់ FA Cup ជុំទី៣ កាលពីរាត្រីថ្ងៃអាទិត្យម្សិលមិញ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សក្នុងការប្រកួតនេះ អ្នកចាត់ការទូទៅក្រុម Liverpool លោក Jurgen Klopp បានប្រើប្រាស់កីឡាករក្មេងៗច្រើនក្នុងជម្រើស១១នាក់ដំបូង ហើយអ្វីដែលគួរឲ្យកត់សម្គាល់នោះគឺ ខ្សែប្រយុទ្ធចំណូលថ្មីសញ្ជាតិជប៉ុនកីឡាករ Takumi Minamino ក៏មានឱកាសបានបង្ហាញខ្លួនជាលើកដំបូងផងដែរ។
ក្រឡេកមកមើលស្ថិតិក្នុងការប្រកួត ក្រុមទាំងពីរមានឱកាសសម្រុកប្រហាក់ប្រហែលគ្នា ដោយក្រុមម្ចាស់ផ្ទះ ស៊ុតបាន១២ជើង ចំគោលដៅ៥ដង សម្រេចទីបាន១គ្រាប់ ចំណែកឯក្រុមភ្ញៀវ ស៊ុតបាន១១ជើង ចំគោលដៅ៨ដង។
១គ្រាប់របស់ Liverpool រកបានតាមរយៈការស៊ុតកោងបញ្ចូលទីយ៉ាងអស្ចារ្យពីសំណាក់ខ្សែបម្រើវ័យ១៨ឆ្នាំកីឡាករ Curtis Jones នៅនាទីទី៧១ ដោយទទួលបាល់ពីមិត្តរួមក្រុមកីឡាករ Divock Origi។
គួរឲ្យដឹងដែរថា Liverpool មិនដែលស្គាល់ពាក្យថាចាញ់នោះទេ គិតត្រឹម២៣ប្រកួតចុងក្រោយក្នុងដីរបស់ពួកគេលេងទល់នឹងក្រុម Everton ពោលគឺឈ្នះ១៣ដង និងស្មើ១០ដង ហើយនេះក៏ជាលើកដំបូងផងដែរ ដែលពួកគេផ្ដួលក្រុម Everton បាន២លើកក្នុង១រដូវកាលចាប់តាំងពីឆ្នាំ១៩៨៦មក៕
បើចង់ឃើញការស៊ុតបញ្ចូលទីកោងស្អាតយ៉ាងណានោះ សូមទស្សនាវីដេអូខាងក្រោម៖