គួរឲ្យអាណិតណាស់! ឆ្មាមួយក្បាលអង្គុយចាំម្ចាស់មុខផ្នូរ ពេលដឹងថាម្ចាស់វាស្លាប់

ឥណ្ឌូនេស៊ី៖ ឆ្មាដ៏គួរឲ្យអាណិតមួយក្បាល ឈ្មោះ Rambo ហាក់ដូចជាមានអារម្មណ៍សោកស្ដាយ និងមិនសប្បាយចិត្តឡើយពេលបានឃើញផ្នូរម្ចាស់វា។

អ្នកប្រើប្រាស់បណ្ដាញសង្គមម្នាក់បានចែករំលែក អំពីរឿងរ៉ាវឆ្មាដែលឪពុកគាត់បានយកមកចិញ្ចឹម និងស្រលាញ់ឆ្មានោះណាស់ ហើយវាតែងតែទៅណាជាមួយនឹងគាត់ជានិច្ច សូម្បីពេលដេក។  នៅថ្ងៃដែលឪពុកគាត់ទទួលមរណៈភាព  Rambo បានធ្លាក់ខ្លួនឈឺ ហើយខ្លួនប្រាណរបស់វាប្រែជាក្ដៅ ហើយមិនចង់ស៊ីអ្វីឡើយ។ ហើយនៅរាត្រីយប់នៃការប្រារព្ធពិធីបុណ្យសព  Rambo ហាក់ដូចបានធូរស្បើយឡើងវិញ ព្រមទាំងបានអង្គុយស្ដាប់ ហាក់ដូចជាវាអាចស្ដាប់យល់អីចឹង។

បន្ទាប់ពីកម្មវីធីបុណ្យសពចប់ វាក៏ឈឺម្ដងទៀត ហើយលោក Fadhil Raihan បានសនិ្នដ្ឋានថានេះមិនមែនជារោគសញ្ញានៃការឈឺចាប់រាងកាយឡើយ តែវាបានបង្ហាញពីភាពមិនសប្បាយចិត្តចំពោះរឿងអ្វីមួយ។ ក្រោយមក  Fadhil Raihan ក៏បាននាំ Rambo ទៅលេងផ្នូររបស់ឪពុកគាត់ ហើយពេលទៅដល់វាក៏អង្គុយចុះយ៉ាងស្ងៀមស្ងាត់ ព្រមទាំងបានសម្លឹងមើលទៅផ្នូរឥតដាក់ភ្នែកទៀតផង។

បន្ទាប់ពី Rambo ត្រលប់មកដល់ផ្ទះវិញ វាក៏ចាប់ផ្ដើមមានសភាពប្រក្រតីឡើងវិញជាធម្មតា។ ក្រោយឃើញសភាពឆ្មាបែបនេះលោក  Fadhil Raihan បានសនិដ្ឋានទៀតថាសត្វក៏មានអារម្មណ៍ដូចមនុស្សដែរ គ្រាន់តែការបង្ហាញចេញរបស់វាអាចខុសពីយើង។

សូមបញ្ជាក់ថាពណ៌សម្បុររបស់ឆ្មាក្នុងរូបថតមើលទៅខុសគ្នាដោយសារ Filter នៃកាមេរ៉ា និងពន្លឺនៅទីតាំងថតតែប៉ុណ្ណោះ៕