Lampard នឹងអនុញ្ញាតឲ្យកីឡាករឆ្នើមរូបនេះចាកចេញ លុះត្រាណាតែក្លិបរកអ្នកជំនួសបាន!

អង់គ្លេស៖ យោងតាមសេចក្ដីរាយការណ៍បានឲ្យដឹងថា ក្លិបតោខៀវ Chelsea នឹងអនុញ្ញាតឲ្យខ្សែការពារស្លាបស្ដាំកីឡាករ Emerson Palmieri ចាកចេញ លុះត្រាណាតែពួកគេស្វែងរកអ្នកជំនួសបាន។

ជម្រើសជាតិអ៊ីតាលី Emerson មិនសូវមានឱកាសបានចូលលេងនោះទេក្នុងរដូវកាលនេះ ពោល២១ប្រកួតកន្លងទៅនៅ Premier League រូបគេបង្ហាញខ្លួនបានតែ១២ប្រកួតប៉ុណ្ណោះ។

យ៉ាងណា កាសែត Independent បានអះអាងថា គ្រូបង្វឹកសញ្ជាតិអ៊ីតាលីលោក Antonio Conte ពេញចិត្តនិងចង់ធ្វើការជាមួយនឹងអតីតកូនក្រុមរបស់លោករូបនេះ ដោយ Inter Milan ត្រៀមកញ្ចប់ទឹកប្រាក់២៥លានផោន(ឬប្រមាណ៣៣លានដុល្លារអាមេរិក) សម្រាប់ចូលចែចូវ។

ប្រភពដដែលបានបន្ថែមទៀតថា Chelsea កំពុងតាមប្រមាញ់ខ្សែការពារស្លាបស្ដាំរបស់ Leicester City កីឡាករ Ben Chilwell ហើយប្រសិនបើពួកគេជោគជ័យក្នុងការផ្ទេរយកជម្រើសជាតិអង់គ្លេសរូបនេះ ពួកគេនឹងអនុញ្ញាតឲ្យ Emerson ចាកចេញ។

គួររម្លឹកផងដែរថា ខ្សែការពារស្លាបវ័យ២៥ឆ្នាំរូបនេះ ត្រូវបាន Chelsea ផ្ទេរយកពីក្លិប Roma កាលពីឆ្នាំ២០១៨ ជាមួយនឹងតម្លៃ២០លានអឺរ៉ូ ដោយបង្ហាញខ្លួនសរុបបាន៤៩ប្រកួតស៊ុតបញ្ចូលទីបាន១គ្រាប់និង Assist បាន៥ដង៕

ប្រភព៖ dailystar