Chelsea និង Man City ប្រជែងគ្នាស្រវ៉ាយកកីឡាករឡើងជើង ១រូបរបស់ Leicester

អង់គ្លេស៖ ក្លិបតោខៀវ Chelsea និងក្លិបមេឃខៀវ Manchester City ត្រូវបានគេរាយការណ៍ថា បានចាប់អារម្មណ៍ក្នុងការចុះកុងត្រាយកខ្សែការពារស្លាបស្ដាំរបស់ក្រុម​ Leicester City កីឡាករ Ben Chilwell។

កីឡាករវ័យ២៣ឆ្នាំ ChilWell មួយរយៈចុងក្រោយនេះតែងតែជាប់ជម្រើស១១នាក់ដំបូងក្នុងក្រុមជម្រើសជាតិអង់គ្លេស ក្រោមការដឹកនាំរបស់លោក​ Gareth Southgate ក្រោយបង្ហាញទម្រង់លេងបានល្អជាមួយនឹងក្រុម Leicester City រដូវកាលនេះ។

បើតាមការចុះផ្សាយរបស់កាសែត The INews ក្លិប Man City និង Chelsea មានចំណាប់អារម្មណ៍ក្នុងការចុះកុងត្រាយកខ្សែការពារស្លាបរូបនេះ ប៉ុន្តែ Leicester គ្មានគម្រោងលក់ Chilwell នៅខែមករានេះទេ ។

ប្រភពដដែលបានបន្ថែមទៀតថា Chilwell ទើបតែចុះកុងត្រាថ្មីរយៈពេល៥ឆ្នាំ ជាមួយនឹង Leicester កាលពីខែតុលាកន្លងទៅ ដោយតម្លៃផ្ដាច់កុងត្រារបស់រូបគេមានតម្លៃប្រមាណ៦០លានផោន។

យ៉ាងណាមិញ Chilwell ហាក់មានចំណុចត្រូវចិត្តច្រើនសម្រាប់គ្រូបង្វឹកថ្មីក្រុម Chelsea លោក Lampard ដោយលោកតែងតែនិយាយថា លោកចូលចិត្តកីឡាករអង់គ្លេសក្មេងៗ។

គួរឲ្យដឹងដែរថាក្រៅពីក្លិបទាំងពីរខាងលើ ក្នុងនោះក្រុមបិសាចក្រហម Manchester United ក៏មានកូនចិត្តចង់បានជម្រើសជាតិអង់គ្លេសរូបនេះ ទៅចាប់ដៃគូជាមួយអតីតមិត្តរួមក្រុម Harry Maguire ផងដែរ៕

ប្រភព៖ dailymail