ឥណ្ឌា៖ ទីភ្នាក់ងារអវកាសរបស់ឥណ្ឌាបាននិយាយនៅថ្ងៃពុធនេះថា ប្រទេសខ្លួនទទួលបានការយល់ព្រមលើបេសកកម្មឡើងទៅឋានព្រះចន្ទជាលើកទី៣ បន្ទាប់ពីយានអវកាសចុងក្រោយរបស់ខ្លួនមិនបានចុះចតដោយជោគជ័យនៅលើឋានព្រះច័ន្ទកាលពីពេលមុន។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សប្រធានអង្គការស្រាវជ្រាវទីអវកាសឥណ្ឌា (ISRO) លោក K. Sivan បានប្រាប់ក្រុមអ្នកយកព័ត៌មាននៅទីស្នាក់ការកណ្តាលរបស់ខ្លួនក្នុងទីក្រុង Bengaluru ថា “បេសកកម្ម Chandrayaan-3 របស់ឥណ្ឌានឹងមានយានចុះចតរួមទាំងយានអង្កេតលើផ្ទៃព្រះច័ន្ទផងដែរ។
បេសកកម្ម Chandrayaan-2 កាលពីខែកញ្ញា បានបាញ់បង្ហោះដោយជោគជ័យទៅតាមគន្លងច័ន្ទគតិដែលអាចបញ្ជូនទិន្នន័យវិទ្យាសាស្ត្រត្រឡប់ទៅផែនដីវិញបាន ប៉ុន្តែមិនអាចដាក់យានអង្កេតលើឋានព្រះច័ន្ទផ្ទាល់បានទេ ដោយសារវាលំបាកខ្លាំងពេក។
បេសកកម្មនោះមានគោលបំណងចុះចតនៅប៉ូលខាងត្បូងនៃឋានព្រះច័ន្ទ ដែលជាកន្លែងមិនធ្លាប់មានបេសកកម្មផ្សេងទៀតបានធ្វើដំណើរទៅពីមុនមក។ តំបន់នោះត្រូវបានគេជឿជាក់ថាវាមានទឹក ខណៈរណ្ដៅនៅក្នុងតំបន់ភាគច្រើន មិនស្ថិតក្រោមសីតុណ្ហភាពខ្ពស់នៃពន្លឺព្រះអាទិត្យនោះទេ។
អង្គការស្រាវជ្រាវទីអវកាសឥណ្ឌា (ISRO) បានបញ្ជាក់ពីវត្តមាននៃដំណក់ក្នុងទម្រង់ជាទឹកកក ដែលត្រូវបានរកឃើញដំបូងក្នុងបេសកកម្មរបស់ខ្លួនកាលពីឆ្នាំ ២០០៨ ។ លោក Sivan បានបន្តថាបេសកកម្ម Chandrayaan-3 នឹងធ្វើតាមរចនាសម្ព័ន្ធប្រហាក់ប្រហែលនឹងបេសកកម្មមុនៗដែរ។
មានតែ សហរដ្ឋអាមេរិក រុស្ស៊ី និងចិនទេ ដែលបានចុះចតនៅលើឋានព្រះច័ន្ទ។ យានអង្កេត Chang’e-4 របស់ទីក្រុងប៉េកាំងបានធ្វើការអង្កេតយ៉ាងស៊ីជម្រៅនៃឋានព្រះច័ន្ទកាលពីឆ្នាំមុន ស្របពេលអ៊ីស្រាអែលទទួលបរាជ័យក្នុងបេសកកម្មចុះចតរបស់យានអវកាស Beresheet នៅលើឋានព្រះច័ន្ទកាលពីខែមេសាឆ្នាំ ២០១៩ ។
ទីភ្នាក់ងារសារព័ត៌មាន PTI បានរាយការណ៍កាលពីថ្ងៃអង្គារថា បេសកកម្មឡើងទៅឋានព្រះច័ន្ទទី៣របស់ឥណ្ឌាទំនងជានឹងចាប់ផ្តើមនៅឆ្នាំ ២០២០ ហើយនឹងចំណាយតិចជាងបេសកកម្មមុនរបស់ខ្លួនដែរ។
លោក Sivan បានបន្ថែមទៀតថា អង្គការស្រាវជ្រាវទីអវកាសឥណ្ឌាកំពុងដំណើរការយ៉ាងរលូនសម្រាប់បេសកកម្មឡើងទៅទីអវកាស ដោយមានអវកាសយានិកដែលគ្រោងនឹងធ្វើនៅចុងឆ្នាំ ២០២១ ។ រដ្ឋាភិបាលបាននិយាយនៅឆ្នាំ ២០១៨ ថាគម្រោងនេះមានឈ្មោះថា Gaganyaan ដែលនឹងចំណាយថវិកាតិចជាង ១០០ ពាន់លានរូពី (១,៤ ពាន់លានដុល្លារ) ។
លោក Sivan ក៏បានប្រកាសផងដែរថា អង្គការស្រាវជ្រាវទីអវកាសឥណ្ឌាបានចាប់ផ្តើមដំណើរការទិញដីសម្រាប់សាងសង់ទីធ្លាបាញ់បង្ហោះយានអវកាសទី២ នៅភាគខាងត្បូងកំពង់ផែនៃទីក្រុង Thoothukudi នៅរដ្ឋ Tamil Nadu ៕