បរទេស៖ វាពិតជាគួរឲ្យភ្ញាក់ផ្អើលណាស់ នៅពេលផ្កាយរណបបានចាប់យករូបភាពនៅតំបន់ដ៏ធំមួយដែលមានសីតុណ្ហភាពខ្ពស់ជាងពេលធម្មតានៅឯមហាសមុទ្រប៉ាស៊ីហ្វិកនៃភាគខាងកើតប្រទេសនូវែលហ្សេឡង់។ ទឹកនៅតំបន់នោះក្ដៅជាងពេលធម្មតារហូតដល់៥អង្សាសេ នេះបើតាមសម្ដីលោក James Renwick ដែលជាសាស្ត្រាចារ្យនិងជាប្រធានផ្នែកភូមិសាស្ត្របរិស្ថាននិងផែនដីវិទ្យានៅសកលវិទ្យាល័យ Victoria ក្នុងទីក្រុង Wellington ប្រទេសនូវែលហ្សេឡង់។ តំបន់ទឹកក្ដៅនៃមហាសមុទ្របាស៊ីហ្វីកគឺអាចចាប់បានដោយផ្កាយរណបពីលើអាកាស ហើយវាជាតំបន់ដ៏ធំមួយដែលមានកម្ដៅលើសសីតុណ្ហភាពទឹកជាមធម្យមនៅលើផែនដីឥឡូវនេះ។ តំបន់សមុទ្រដែលមានកម្ដៅលើសពីសីតុណ្ហភាពជាមធ្យមមានទំហំប្រហែលមួយលានគីឡូម៉ែត្រក្រឡា ហើយទំហំនេះគឺធំជាងរដ្ឋតិចសាស់របស់សហរដ្ឋអាមេរិកទៅទៀត។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សលោកសាស្ត្រាចារ្យ Renwick បានបន្តទៀតថាមួយអង្សាសេនៅសមុទ្រគឺខ្ពស់ ហើយបើកើនដល់ប្រាំអង្សាសេគឺពិតជាខ្ពស់ខ្លាំងណាស់។ វាគឺជារឿងមួយដ៏កម្រដែលឃើញតំបន់ដ៏ធំមួយមានសីតុណ្ហភាពកើនខ្ពស់ជាងពេលធម្មតា ហើយក្រុមអ្នកវិទ្យាសាស្ត្រនិយាយថាការប្រែប្រួលអាកាសធាតុបានធ្វើឲ្យបាតុភូតផ្សេងៗកើតឡើងជាបណ្ដើរៗហើយ។ នៅលើផែនទីថតដោយផ្កាយរណបគេឃើញមានសញ្ញាក្រហមដ៏ធំមួយនៅលើមហាសមុទ្រ ដែលវាបានបង្ហាញប្រាប់ថានៅតំបន់នោះមានសីតុណ្ហភាពកើនលើសតំ បន់ដែលនៅជុំវិញវា ហើយវាពិតជាជះឥទ្ធិពលយ៉ាងខ្លាំងដល់ប្រព័ន្ធអេកូឡូស៊ីនៅតំបន់នោះផងដែរ៕