យូរៗឃើញ វី ឌីណែត លេងឈុតបែបនេះម្តង ស្អាតប្លែកភ្នែកសាហាវ មើលមិនចង់ស្គាល់!

ភ្នំពេញ៖ គ្រាប់ពេជ្រតែមួយគត់របស់តារាចម្រៀងប្រុសជើងចាស់ លោក ហួរ ឡាវី កញ្ញា វី ឌីណែត ដែលនាងជាកូនស្រីតែមួយគត់ ដែលស្នងតំណែងឈាមជ័រជាអ្នកសិល្បៈ ពីលោកឪពុក ហើយបច្ចុប្បន្ននេះ នាងកំពុងតែជ្រកក្រោមផលិតកម្ម រស្មីហង្សមាស និងទទួលបានការគាំទ្រច្រើនមិនធម្មតា ពីសំណាក់ប្រិយមិត្តទស្សនិកជន។

តួយ៉ាង កញ្ញា វី ឌីណែត ម្ចាស់បទ«កុំស្តាយពេលបាត់បង់ខ្ញុំ» រូបនេះ មិនត្រឹមតែមានទឹកដមសម្លេងពិរោះក្រអួនក្រអៅតែប៉ុណ្ណោះនោះទេ ប៉ុន្តែនាងថែមទាំងអាចរាំបានយ៉ាងល្អ និងនិយមចូលចិត្តលេងម៉ូតសម្លៀកប្លែកៗទាក់ទាញ រាល់ពេលឡើងឆាកម្តងៗផងដែរ។

ជាក់ស្តែង ក៏ដូចជាកាលពីម្សិលមិញនេះ កញ្ញា វី ឌីណែត ត្រូវបានគេអញ្ជើញទៅសម្តែងនៅក្នុងកម្មវិធីប្រគុំតន្រ្តីមួយ ដោយឡែក អ្វីដែលគួរឲ្យចាប់អារម្មណ៍បំផុតនោះ គឺម៉ូតសម្លៀកបំពាក់និងការតុបតែងខ្លួនរបស់នាង ក៏ដូចជាសមាជិកក្រុមរាំរបស់នាងផ្ទាល់តែម្តង។

ដោយក្នុងនោះ កញ្ញា វី ឌីណែត បានលេងនូវឈុតរោមសត្វពណ៌ក្រហមឆ្អិនឆ្អៅ ម៉ូតសក់ខ្លីពណ៌ឆើត អមជាមួយនឹងក្រុមរាំស្លៀកឈុតពណ៌ខ្មៅ កាន់ឆ័ត្ររំយោល បង្កើតជាទស្សនីយភាពនៃការសម្តែងរបស់នាង ឲ្យកាន់តែមានភាពឲ្យទាក់ភ្នែកប្លែកភ្នែកជក់ចិត្តថែមមួយកម្រិតទៀតផងដែរ៕