ខេត្តសៀមរាប ៖ រមណីយដ្ឋាន​អង្គរ​ក្រៅ​ដែល​ពី​មាន​ប្រាង្គ​ប្រាសាទ​ដ៏​មហា​អស្ចារ្យ ហើយ​ក៏​មានព្រៃ​ជា​ដែនជម្រកសត្វព្រៃ​ដ៏​មាន​សុវត្ថិភាព ដែល​ត្រូវ​បាន​អង្គការ​សម្ព័ន្ធមិត្ត​សត្វព្រៃ (WILDLIFEALLIANCE) សហការ​ជាមួយ​អាជ្ញាធរ​ជាតិ​អប្សរា និង​រដ្ឋបាល​ព្រៃឈើ ជ្រើស​ជាទី​តាំង​សម្រាប់​លែង​សត្វព្រៃ​កម្រ និង​ជិត​ផុត​ពូជ​ចំនួន​៥​ប្រភេទ តាំងពី​ឆ្នាំ​២០១៣​។

តាម​ការ​បញ្ជាក់​របស់​លោក យិ​ត ចាន់​ដា​រដ្ឋ អគ្គនាយករង​អាជ្ញាធរ​ជាតិ​អប្សរា ឱ្យ​ដឹង​ថា រយៈ​ពេល​៦​ឆ្នាំ​កន្លង​មកនេះ សត្វព្រៃ​កម្រ និង​ជិត​ផុត​ពូជ​ចំនួន​៥​ប្រភេទ រួម​មាន សត្វ​ទោច​ម្កុដ​ចំនួន ៨​ក្បាល (២​ក្បាល​កំពុង​ផ្សាំ​), ឈ្លូស ៤​ក្បាល​, សំពោចក្រអូប​៥​ក្បាល​, សត្វ​ភេ​៥​ក្បាល និង​ស្វាព្រាហ្មណ៍ ១២ ក្បាល ត្រូវ​បាន​យក​មក​ផ្សាំ និង​លែងឱ្យ​រស់នៅ​ក្នុង​ព្រៃ​ឧទ្យាន​អង្គរ ក្រោម​ការ​មើលថែ​យ៉ាង​ល្អ​ប្រសើរ​។

ប្រភព​សត្វ​ទាំងនេះ ខ្លះ​យក​មក​ពី​ឧទ្យាន​ភ្នំ​តា​ម៉ៅ និង​ខ្លះ​យក​មក​ពី​កោះ​ក្រ​ពី ខេត្តកោះកុង ហើយ​យក​មក​លែង​នៅ​ទីតាំង​សំខាន់​ចំនួន​៣ ក្នុង​រមណីយដ្ឋាន​អង្គរ​ដូច​ជា នៅ​ខ្លោងទ្វារ​ខ្មោច ខ្លោងទ្វារ​តា​កាវ និង​ប្រាសាទ​តា​នៃ ដែល​មានព្រៃ​ស៊ុបទ្រុប សុវត្ថិភាព​សម្រាប់​កា​រស់នៅ​របស់​ពួក​គេ​។

លោក យិ​ន ចាន់ ដា​រដ្ឋ បាន​បន្ត​ថា ការ​លែង​សត្វព្រៃ​ក្នុង​តំបន់​អង្គរ គឺ​ក្នុង​បំណង​រួមចំណែក​អភិរក្ស​សត្វព្រៃ ដែល​បច្ចុប្បន្ន​កំពុង​ប្រឈម​នឹង​គ្រោះថ្នាក់ និង​ការ​ផុត​ពូជ​ជាដើម​។ ជា​ពិសេស​សត្វព្រៃ​ក៏​ជា​ប្រភព​ដ៏​សំខាន់​មួយ​ក្នុង​ការ​ទាញ​ទេសចរ ព្រោះ​វា​មិន​បាន​ផ្តល់​ផល​អាក្រក់ ឬ​គ្រោះថ្នាក់​ដល់​មនុស្ស​ឡើយ បើ​មនុស្ស​មិន​រំលោភ​បំពាន​លើ​ពួក​វា​។

ចំពោះ​ការ​ថែទាំ​សត្វព្រៃ​កម្រ​ទាំង​៥​ប្រភេទ​នេះ មាន​ភ្នាក់ងារ​បំពេញការងារ​ជា​ប្រចាំ​ពីរ​នាក់ មាន​កាមេរ៉ា​សុវត្ថិភាព​សម្រាប់​តាមដាន​សកម្មភាព​សត្វ និង​សកម្មភាព​យាយី​ពី​ជនខិលខូច​។ មិន​តែប៉ុណ្ណោះ ក៏​មានការ​ចុះ​តាមដាន​ដោយ​ផ្ទាល់​ពី​អង្គការ​សម្ព័ន្ធមិត្ត​សត្វព្រៃ​យ៉ាង តិច​១​ខែ​ម្តង ដើម្បី​តាមដាន​ពី​សុខភាព​សត្វ​ផង​ដែរ​។

នៅ​ក្នុង​តំបន់​អង្គរ ក្រៅពី​មាន​សត្វព្រៃ​កម្រ​ទាំង​៥​ប្រភេទ​នេះ ក៏​មាន​សត្វ​ជា​ច្រើន​ប្រភេទ​ដែល​បាន​រស់នៅ​តាំងពី​យូរហើយ​ដែរ ដូច​ជា ស្ទាំង ពស់ កាំ​ប្រ​ម៉ា មាន់ព្រៃ​។​ល​។

ហើយ​ជា​ចក្ខុវិស័យ​ទៅ​អនាគត អាជ្ញាធរ​ជាតិ​អប្សរា អង្គការ​សម្ព័ន្ធមិត្ត​សត្វព្រៃ និង​រដ្ឋបាល​ព្រៃឈើ ក៏​មាន​គម្រោង​យក​សត្វព្រៃ​ជា​ច្រើន​ប្រភេទ​ខុស​គ្នា​មាន​ក្ងោក បក្សី សត្វ​កម្រ សត្វ ចតុបាទ មក​ដោះ​លែង​នៅ​ក្នុង​តំបន់​អង្គរ​បន្ថែម ដើម្បី​លើក​តម្លៃ​អង្គរ និង​ទាក់ទាញ​ទេសចរ​៕

ប្រភព​​​៖ កោះសន្តិភាព

បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected] (3) LINE, VIBER: 098282890 (4) តាមរយៈទំព័រហ្វេសប៊ុកខ្មែរឡូត https://www.facebook.com/khmerload

ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]

ចង់ក្លាយជាអ្នកសរសេរក្រៅម៉ោងមានប្រាក់ចំណូលសូមចុះឈ្មោះទីនេះ