បារាំង៖ នៅទសវត្សរ៍ចុងក្រោយនេះ គេសង្កេតឃើញថាសន្ទុះនៃការរុករកភពដែលនៅក្រៅប្រព័ន្ធព្រះអាទិត្យមានការហក់ឡើងជាលំដាប់ ជាឧទាហរណ៍បេសកកម្មនៃផ្កាយរណប TESS របស់អង្គការណាសាសម្រាប់ស្វែងរកភពដែលអាចទ្រទ្រង់ជីវិត ភពដែលនៅក្បែរប្រព័ន្ធព្រះអាទិត្យ និងភពឧស្ម័នយក្សដែលទើបនឹងកកើត។ ឥឡូវនេះ ទីភ្នាក់ងារអវកាសអឺរ៉ុបកំពុងចាប់ផ្ដើមគម្រោងថ្មីក្នុងការបញ្ជូនផ្កាយរណប Cheops ទៅទីអវកាសដើម្បីសិក្សានិងតាមដានភពនៅក្រៅប្រព័ន្ធព្រះអាទិត្យផងដែរ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សវាជាបេសកកម្មដំបូងគេរបស់ទីភ្នាក់ងារអវកាសអឺរ៉ុបក្នុងការបញ្ជូនផ្កាយរណប Cheops ដើម្បីឲ្យទៅសិក្សាភពនៅក្រៅប្រព័ន្ធព្រះអាទិត្យ ប៉ុន្តែបេសកកម្មមួយនេះផ្ដោតទៅលើភពដែលត្រូវបានគេរកឃើញស្រាប់ហើយ និងបន្ទាប់មកទៀតវាត្រូវប្រមូលព័ត៌មានថ្មីៗដែលគេមិនទាន់រកឃើញ។ លោក Günther Hasinger ដែលជានាយកវិទ្យាសាស្ត្ររបស់ទីភ្នាក់ងារអវកាសអឺរ៉ុបបានមានប្រសាសន៍បន្ទាប់ពីរកឃើញភពនៅក្រៅប្រព័ន្ធព្រះអាទិត្យជាច្រើនមក បេសកកម្មបន្ទាប់គឺត្រូវសិក្សាលក្ខណៈរូបនិងគីមីរបស់ភពទាំងនេះដើម្បីឲ្យដឹងថាតើពួកវាផ្សំឡើងដោយរបៀបណា។
ផ្កាយរណប Cheops បានបញ្ជូនទៅទីអវកាសតាមរយៈរ៉ុក្កែត Soyuz-Fregat នៅឯព្រលានអវកាសក្នុងតំបន់ Kourou នៃប្រទេសបារាំង៕