សម្រាប់ប៉ា! ៣ចំណុច កុំភ្លេចឲ្យម៉ាក់ញ៉ាំផ្លែទទឹមពេលកំពុងពរពោះ

ផ្លែទទឹម មិនត្រឹមតែជាផ្លែឈើ ដែលមានរសជាតិផ្អែមឆ្ងាញ់ប៉ុណ្ណោះទេ វាថែមទាំងសម្បូរទៅដោយជីវជាតិដែលរាងកាយរបស់យើងត្រូវការខ្លាំងបំផុត។ ជាពិសេសសម្រាប់ស្ត្រីមានផ្ទៃពោះ ត្រូវបានអ្នកជំនាញណែនាំឲ្យទទួលទានផ្លែទទឹមរាល់ថ្ងៃ ព្រោះវាផ្តល់អត្ថប្រយោជន៍អស្ចារ្យមួយចំនួន។

១. ការពារកង្វះឈាមក្រហម

ទទឹម ត្រូវបានគេរកឃើញថា មានផ្ទុកជាតិដែក ពីធម្មជាតិ ដែលអាចជួយបង្កើនកម្រិតអេម៉ូក្លូប៊ីន នៅក្នុងឈាមឲ្យត្រឡប់មកធម្មតាវិញ។ ហេតុនេះ ចំពោះស្ត្រីមានផ្ទៃពោះ ដែលជួបបញ្ហា កង្វះឈាមក្រហម មិនបាច់ព្រួយបារម្ភឡើយ ប្រសិនបើទទួលទានផ្លែទទឹម រាល់ថ្ងៃ។

២. ជំរុញដល់ការស្រូបយកជាតិដែក

ដើម្បីអាចស្រូបយកជាតិដែក បានល្អ លុះត្រាតែក្នុងរាងកាយមានវីតាមីន C ។ វីតាមីន C នៅក្នុងផ្លែទទឹម មានសមត្ថភាពជួយជំរុញឲ្យរាងកាយមានការស្រូបយកជាតិដែក ពីចំណីអាហារបានយ៉ាងល្អ។ នេះហើយ ជាមូលហេតុមួយទៀត ដែលស្ត្រីមានផ្ទៃពោះទាំងឡាយ គួរតែទទួលទានផ្លែទទឹមជាប្រចាំ។

៣. សម្រួលបញ្ហាទល់លាមក

បញ្ហាមួយក្នុងចំណោមបញ្ហាជាច្រើន ដែលស្ត្រីមានផ្ទៃពោះតែងតែជួបប្រទះ គឺការទល់លាមក ជាពិសេសក្នុង៣ត្រីមាសចុងក្រោយ។ តែប្រសិនបើអ្នកមានទម្លាប់បន្ថែមអាហារ ដែលសម្បូរជាតិសរសៃជាប្រចាំថ្ងៃ គឺជាវិធីសាស្ត្រដ៏ល្អបំផុតក្នុងការដោះស្រាយបញ្ហា។

ផ្លែទទឹម គឺជាប្រភពនៃជាតិសរសៃ ដែលមានសមត្ថភាពអាចជួយជំរុញដល់ចលនាពោះវៀន ឲ្យដំណើរការបានយ៉ាងល្អ ហេតុនេះអ្នកគួរតែទទួលទានផ្លែទទឹម មួយថ្ងៃឲ្យបានមួយចំហៀង៕

ប្រភព៖​​ Royal Ausnz Cambodia