ទីក្រុងតូក្យូ៖ ប្រទេសជប៉ុនកំពុងតែជួបប្រទះជាមួយនឹងកំណត់ត្រាដ៏ខ្ពស់បំផុតនៃការបាត់បង់ជីវិតដោយសារតែការធ្វើការជ្រុលពេក ដែលភាសាជប៉ុនហៅថា «Karoshi» ហើយវាកំពុងតែរាតត្បាតយ៉ាងខ្លាំងនៅក្នុងចំណោមក្រុមយុវវ័យ ដែលភាគច្រើនបម្រើជាបុគ្គលិកក្រុមហ៊ុននៅក្នុងប្រទេសនេះ ជាពិសេសនារី ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សជាមួយនឹងអត្រាទាមទារការងារ ១.២៨ ក្នុងចំណោមមនុស្សម្នាក់ ដែលជាអត្រាខ្ពស់បំផុតចាប់តាំងពីឆ្នាំ ១៩៩១ ស្របជាមួយនឹងចំនួនប្រជាជនកំពុងតែមានការថយចុះផងនោះ ប្រទេសជប៉ុនកំពុងតែខ្វះខាតយ៉ាងខ្លាំងនូវកម្លាំងពលកម្ម។ ជាមួយគ្នានេះដែរ ច្បាប់ការងារដែលមានលក្ខណៈធូរស្រាល បានបើកឱកាសឲ្យក្រុមហ៊ុនឯកជនបង្ខំបុគ្គលិករបស់ខ្លួនឲ្យធ្វើការ ដើម្បីកាត់បន្ថយប្រាក់ចំណាយសម្រាប់ជួលបុគ្គលិកបន្ថែម។
យោងទៅតាមទិន្នន័យរបស់ក្រសួងការងារ កាលពីឆ្នាំទៅ ចំនួនពាក្យបណ្តឹងទាមទារសំណង់សម្រាប់ការស្លាប់ដោយសារតែការធ្វើការជ្រុល ឬ Karoshi នេះ មានរហូតទៅដល់ ១,៤៥៦ បណ្តឹង ដែលចំនួននេះជាចំនួនខ្ពស់បំផុតក្នុងប្រវត្តិសាស្រ្ត។ ភាគច្រើននៃអ្នកដែលបានស្លាប់គឺ ជាបុគ្គលិកវ័យក្មេងដែលបម្រើការក្នុងនៅវិស័យដែលកំពុងតែជួបប្រទះនឹងការខ្វះខាតបុគ្គលិក រួមមាន សុខាភិបាល សេវាសង្គម វេចខ្ចប់ និងសំណង់ ជាដើម។
ទោះបីជាយ៉ាងណា លោក Hiroshi Kawahito ជាអគ្គលេខាធិការនៃក្រុមប្រឹក្សាការពារជាតិសម្រាប់ជនរងគ្រោះដោយ Karoshi បានអះអាងថា តួលេខពិតអាចជាច្រើនជាងនេះ ១០ ដង ក៏ប៉ុន្តែរដ្ឋាភិបាល ពុំព្រមទទួលស្គាល់ករណីជាច្រើនទៀត។
លោកបាននិយាយថា៖ «រដ្ឋាភិបាលបានរៀបចំសិក្ខាសាលា និងបង្កើតបដាជាច្រើនពីបញ្ហានេះ ក៏ប៉ុន្តែវាគ្រាន់តែជាប្រជាភិថុត (Propaganda) តែប៉ុណ្ណោះ។ ដំណោះស្រាយបញ្ហាពិតប្រាកដគឺការកាត់បន្ថយម៉ោងធ្វើការ តែរដ្ឋាភិបាលពុំបានធ្វើវាគ្រប់គ្រាន់ឡើយ»។
គួរកត់សម្គាល់ផងដែរថា ប្រទេសជប៉ុនពុំមានច្បាប់ដែលកំណត់ម៉ោងធ្វើការឡើយ ក៏ប៉ុន្តែក្រសួងការងារបានទទួល Karoshi ចំនួនពីរប្រភេទគឺ ការស្លាប់ដែលបណ្តាលមកពីជម្ងឺបេះដូង ឬ សម្ពាធឈាម ដោយសារតែការធ្វើការជ្រុលពេក និង ការធ្វើអត្តឃាតបន្ទាប់ពីមានភាពតានតឹងអារម្មណ៍ខ្លាំងដែលទាក់ទងនឹងការធ្វើការងារ។
សម្រាប់ប្រភេទទី១ ដើម្បីឲ្យគេទទួលស្គាល់បាន បុគ្គលិកដែលស្លាប់ត្រូវតែធ្វើការបន្ថែមម៉ោងចំនួន ១០០ ម៉ោងនៅមួយខែមុន ឬ ៨០ ម៉ោងក្នុងប្រាំមួយខែមុននឹងស្លាប់។ ឯចំណែកប្រភេទទី ២វិញ បុគ្គលិកដែលបានធ្វើអត្តឃាត ត្រូវតែបានធ្វើការបន្ថែមម៉ោងចំនួន ១៦០ ម៉ោង ក្នុងមួយខែ ឬ ១០០ ម៉ោងក្នុងបីខែមុននឹងធ្វើអត្តឃាត។
ទិន្នន័យក្រសួងការងារបានបង្ហាញថា ក្នុងរយៈពេលបួនឆ្នាំចុងក្រោយនេះ ការធ្វើអត្តឃាត ដែលទាក់ទងនឹងការងារបានកើនឡើង ៤៩ ភាគរយ សម្រាប់បុគ្គលិកដែលមានអាយុ ២៩ ឆ្នាំ ឬក្មេងជាងនេះ និង ៣៩ ភាគរយសម្រាប់បុគ្គលិកដែលជាស្រ្តី។
លោក Hirokazu Ouchi ជាសាស្រ្តាចារ្យផ្នែកអប់រំនៃសាកលវិទ្យាល័យ Chukyo បានលើកឡើងថា ក្រសួងការងាររបស់ប្រទេសជប៉ុនក៏ពុំមានបុគ្គលិកគ្រប់គ្រាន់សម្រាប់តាមដានពាក្យបណ្តឹងទាំងនេះដែរ។
លោកបាននិយាយថា៖ «នេះគឺជាវិធីមួយដែលបើកឲ្យក្រុមហ៊ុននានាកាត់បន្ថយការចំណាយទៅលើកម្លាំងពលកម្ម ក៏ប៉ុន្តែវាក៏ជាវិធីដែលនាំទៅរកការស្លាប់ដោយសារតែការធ្វើការងារជ្រុលពេកផងដែរ»៕
ប្រភព៖ Strait Times
Bong I.T