រាជធានីភ្នំពេញ ៖ តារាកំប្លែង និងអាយ៉ៃជើងចាស់អ្នកស្រីនួន សារី ហៅយ៉យ បានបដិសេធថា គាត់មិនបានចេញទៅរស់នៅអាមេរិកដូចពាក្យចចាមអារ៉ាមទេ ។ ជាក់ស្ដែងបច្ចុប្បន្នអ្នកស្រីកំពុងនៅស្រុកខ្មែរ និងចូលរួមក្នុងការសម្តែងនានា ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សការបញ្ជាក់ពីយាយយ៉យ កាលពីពេល ថ្មីៗកន្លងមកបន្ទាប់ពីមួយរយៈចុងក្រោយនេះអ្នកស្រីហាក់មិនឃើញសម្ដែងតាមកញ្ចក់ទូរទស្សន៍ ក្នុងពេលដែលកម្មវិធីសោភ័ណតន្ត្រីរបស់ស្ថានីយទូរទស្សន៍CTN ដែលអ្នកស្រីតែងតែសម្តែងអាយ៉ៃឆ្លើយឆ្លងជាមួយលោក ព្រហ្ម ម៉ាញ ក៏បាត់មុខដែរ ។
ការបាត់មុខនេះធ្វើឲ្យមហាជនដែលជាអ្នកគាំទ្រអ្នកស្រីនួន សារី ជជីកសួរគ្នាទៅវិញទៅមក ក្នុងនោះទស្សនិកជនខ្លះសង្ស័យថា អ្នកស្រីអាចនឹងចេញទៅរស់នៅអាមេរិកបាត់ទៅហើយ ។
ការសង្ស័យនេះយាយយ៉យ បានសម្តែងការហួសចិត្ត និងដាក់ចម្ងល់ពីការលើកឡើងនេះចេញពីប្រភពណា ដ្បិតអ្នកស្រីកំពុងមានវត្តមាននៅស្រុកខ្មែរ និងទទួលការសម្តែងជាបន្តបន្ទាប់នោះ ។
បើយោងតាមអ្វីដែលយាយយ៉យ បង្ហោះសារនៅលើហ្វេសប៊ុកនោះបញ្ជាក់ថា «ប៉ុន្មានថ្ងៃនេះឆ្ងល់ណាស់ហេតុអីមានបងប្អូនចេះតែទូរស័ព្ទមកសួរថាខ្ងុំទៅរស់នៅសហរដ្ឋអាមេរិកហើយមែនទេ ? ហើយកំពុងឆ្ងល់ថាបងប្អូនបានពាក្យនេះមកពីណា ? អ៊ីចឹងសូមបង្ហាះសារជូនបងប្អូនថា ខ្ញុំនៅស្រុកខ្មែរទេ »។
យាយយ៉យ ក៏បានប្រាប់មហាជនថា អ្នកស្រីនៅតែទទួលយកការសម្តែងគ្រប់កម្មវិធី ប្រសិនបើមានបំណងហៅអ្នកស្រីឲ្យសម្តែង ។
ជាការកត់សម្គាល់ការបាត់មុខប៉ុន្មានកម្មវិធីក្នុងការច្រៀងអាយ៉ៃជាមួយលោកព្រហ្ម ម៉ាញ របស់ស្ថានីយទូរទស្សន៍ CTN នោះ កន្លងមក នាយព្រែក ដែលជាកូនរបស់អ្នកស្រីនួន សារី ក៏ធ្លាប់បានបញ្ជាក់ពីមូលហេតុផងដែរ ។
នាយព្រែក បញ្ជាក់ថា ការបាត់វត្តមានសម្តែងអាយ៉ៃប្រមាណជា២សប្តាហ៍នៅលើកញ្ចក់ទូរទស្សន៍ CTN របស់ម្តាយខ្លួន គឺដោយសារគាត់មានបញ្ហាជាប់សរសៃចង្កេះ ដែលតម្រូវឲ្យព្យាបាលមួយរយៈខ្លីនៅមន្ទីរពេទ្យ ។ បន្ទាប់ពីទទួលការព្យាបាលរួចម្តាយរបស់លោកនឹងបង្ហាញមុខសម្តែងវិញហើយ ៕
ប្រភព៖ កោះសន្តិភាព