រស់នៅក្នុងសង្គមមួយ យើងពុំអាចរស់នៅដោយសោះកក្រោះតែម្នាក់ឯងបាន។ យើងត្រូវការមិត្តភាពជាកម្លាំងចិត្តពីគ្រួសារ និងមិត្តភក្តិ។ ប៉ុន្តែបន្ទាប់ពីរាប់អានមិត្ត តើយើងដឹងថាគេស្មោះត្រង់នឹងយើងដោយរបៀបណា?
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សកត្តាទាំង ៧ យ៉ាងដែលអាចបញ្ជាក់ថាគេស្មោះត្រង់នឹងយើងប្រាកដមែន៖
១. រក្សាសន្យា
រក្សាការសន្យាវាពិតជាមានន័យណាស់សម្រាប់មនុស្សម្នាក់ៗ ប្រសិនបើអ្នកមិនអាចធ្វើនូវអ្វីដែលបានសន្យា សូមពន្យល់ហេតុផលដល់គេឲ្យបានច្បាស់។ ហើយកុំធ្វើឲ្យរឿងនោះកើតឡើងម្តងទៀត ប្រសិន បើរឿងនោះកើតឡើងម្តងទៀត អ្នកជាមិត្តដែលមិនគួរឲ្យទុកចិត្ត។ ធ្វើតាមការសន្យារបស់អ្នក បើមិនចង់បាត់បង់មិត្តភាព។
២. រក្សាទំនុកចិត្តឲ្យគ្នា
ភាពអាចទុកចិត្តបានគឺជាកត្តាសំខាន់បំផុតសម្រាប់ក្លាយជាមិត្តល្អ។ មិត្តរបស់អ្នកត្រូវការគាំទ្រ ជាពិសេសនៅក្នុងគ្រាលំបាក គ្មាននរណាម្នាក់ចង់ធ្វើជាមិត្តភក្តិជាមួយមនុស្សដែលមិនចាប់អារម្មណ៍នឹងពួកគេឡើយ។ ហើយប្រសិនបើអ្នកនោះដឹងថាអ្នកកំពុងបំផ្លាញទំនុកចិត្តរបស់មិត្តអ្នក នៅទីបំផុតពួកគេនឹងឈប់ជឿអ្វីដែលអ្នកនិយាយ។ ហើយអ្វីដែលសំខាន់ចូររៀនយកចិត្តគេ មកដាក់ចិត្តយើង។
៣. ចេះទទួលកំហុស
មនុស្សម្នាក់ៗមិនដែលធ្វើអ្វីត្រូវទាំងអស់នោះទេ តែងតែមានកំហុស តែអ្វីដែលសំខាន់បំផុតគឺការធ្វើខុសហើយ ចេះទទួលកំហុស និងប្រយ័ត្នមិនឲ្យវាកើតឡើងម្តងទៀត។ ដូចជាពេលដែលអ្នកមានកំហុស អ្នកបានធ្វើការសុំទោសដល់មិត្តរបស់អ្នក ទោះបីមិត្តរបស់អ្នកមិនសប្បាយចិត្តដែលអ្នកបានធ្វើខុសក៏ដោយ តែពួកគេនឹងរីករាយដែលអ្នកទទួលកំហុស និងនិយាយពាក្យសុំទោសដល់ពួកគេ។
៤. ជំទាស់ ពេលឃើញមិត្តដើរផ្លូវមិនល្អ
នៅពេលដែលមិត្តអ្នកធ្វើនូវសកម្មភាពអ្វីដែលអ្នកគិតថាមិនល្អ ឧទាហរណ៍៖ អំពើអបាយមុខជាដើម អ្នកគួរតែជំទាស់ មិនមែនឆ្លើយថាយល់ស្របរហូតនោះទេ។ ទោះដឹងថាវាការប្រឆាំងនឹងមិត្តក៏ដោយ តែត្រូវនិយាយឲ្យមិត្តអ្នកដឹងពីអ្វីដែលអ្នកគិត និងប្រាប់ពីមូលហេតុដែលសមស្រម ពិត និងច្បាស់លាស់។
៥. មិនរាប់អានដើម្បីតែប្រយោជន៍
ប្រសិនបើមិត្តអ្នកដឹងថា អ្នកកំពុងរាប់អានគេដោយគិតតែផលប្រយោជន៍ពីគេ ឬរាប់គ្នាដើម្បីបានរបស់ជាថ្នូរមកវិញនោះ អ្នកនឹងក្លាយជាមនុស្សដែលបំផ្លាញក្តីទុកចិត្តពីមិត្ត និងអាចបំផ្លាញមិត្តភាពផងដែរ។
៦. ភាពស្មោះត្រង់
ប្រសិនបើមិត្តរបស់អ្នកប្រាប់អ្វីមួយដល់អ្នកដោយភាពជឿជាក់ ចូរទុកវាជាអាថ៌កំបាំង ហើយកុំនិយាយអំពីរឿងនេះជាមួយអ្នកផ្សេង។ កុំនិយាយដើមមិត្តរបស់អ្នកនៅពីក្រោយខ្នង ត្រូវស្មោះត្រង់នឹងមិត្តពិតរបស់អ្នក ព្រោះភាពស្មោះត្រង់គឺសំខាន់ណាស់ក្នុងការរក្សាមិត្តភាពយូរអង្វែង។
៧. គោរពគ្នា
មិត្ដដែលល្អគឺតែងតែបង្ហាញការគោរពចំពោះគ្នាទៅវិញទៅមក ដោយមិនប្រកាន់ថាអ្នកជាអ្នកមាន ឬអ្នកក្រនោះឡើយ។ តែសំខាន់ការគោរពនោះគឺបង្ហាញពីការគោរពដ៏ស្មោះត្រង និងរចេញពីចិត្តរបស់ពួកគេ៕