នាយករដ្ឋមន្ត្រីថ្មីរបស់ហ្វាំងឡង់ទាំងស្អាតទាំងឆ្លាតហើយថែមទាំងជានាយករដ្ឋមន្ត្រីដែលមានវ័យក្មេងជាងគេនៅលើពិភពលោកទៀត

ហ្វាំងឡង់៖ អ្នកស្រី Sanna Marin ដែលមានអាយុ៣៤ឆ្នាំមកពីគណៈបក្សសង្គមប្រជាធិបតេយ្យបានជាប់ឆ្នោត និងត្រូវបានជ្រើសរើសឲ្យក្លាយជានាយករដ្ឋមន្ត្រីនៃប្រទេសហ្វាំងឡង់ កាលពីថ្ងៃអាទិត្យកន្លងទៅនេះ។ អ្នកស្រីនឹងក្លាយជានាយករដ្ឋមន្ត្រីក្មេងជាងគេនៅលើពិភពលោក បន្ទាប់ពីអ្នកស្រីចូលស្បថឡើងកាន់តំណែងនៅថ្ងៃអង្គារនេះរួច។ ចាប់ពីថ្ងៃអង្គារនេះទៅអ្នកស្រី Sanna Marin នឹងឡើងកាន់តំណែងជំនួសនាយករដ្ឋមន្ត្រីចាស់គឺលោក Antti Rinne។

គួររម្លឹកផងដែរថាមុននឹងក្លាយជានាយករដ្ឋមន្ត្រី អ្នកស្រីធ្លាប់ធ្វើជាមន្ត្រីនៅក្រសួងដឹកជញ្ជូន។ នាយករដ្ឋមន្ត្រីវ័យក្មេងរូបនេះមានប្រសាសន៍ថាការងារជាច្រើនកំពុងរង់ចាំគាត់ ហើយអ្នកស្រីនឹងធ្វើឲ្យប្រជាជនមានជំនឿជឿជាក់លើរូបគាត់។ អ្នកស្រីបានបន្តទៀតថារូបគាត់មិនដែលខ្វាយខ្វល់ពីវ័យឬភេទឡើយ ហើយហេតុផលដែលនាំឲ្យគាត់ក្លាយជាអ្នកនយោបាយ គឺការយកបាននូវសេចក្ដីទុកចិត្តពីអ្នកបោះឆ្នោត។

អ្នកស្រី Marin មិនមែនជាមេដឹកនាំតែម្នាក់គត់ដែលមានវ័យចន្លោះអាយុ ៣០ឆ្នាំនោះទេ ពោលគឺមានលោក Oleksiy Honcharuk អាយុ៣៥ឆ្នាំ ជានាយករដ្ឋមន្ត្រីប្រទេសអ៊ុយក្រែន និងនាយករដ្ឋមន្ត្រីប្រទេសនូវែលហ្សេឡង់ផងដែរ គឺអ្នកស្រី Jacinda Ardern ដែលមានអាយុ៣៩ឆ្នាំ៕