ឧស្សាហ៍ប្រើថ្នាំលាបពណ៌សក់ ឬថ្នាំអ៊ុតសក់ត្រង់ជាញឹកញាប់ អាចបង្កឱ្យមានជំងឺមហារីកសុដន់ក្នុងរយៈពេលណាមួយ។ នេះបើតាមលទ្ធផលស្រាវជ្រាវវិទ្យាសាស្រ្ត។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សក្រុមអ្នកវិទ្យាសាស្រ្តនៃវិទ្យាស្ថានសុខភាពជាតិ សហរដ្ឋអាមេរិក បានសិក្សាតាមដានទៅលើ ស្រ្តីប្រមាណជិត៥ម៉ឺននាក់ ដោយចំណាយរយៈពេលជាង៨ឆ្នាំ។ ហើយការសិក្សា បានបង្ហាញថា ស្ត្រីដែលប្រើថ្នាំលាបពណ៌សក់ញឹកញាប់ មានហានិភ័យ ៩% វិវឌ្ឍទៅជាជំងឺមហារីកសុដន់ បើប្រៀបទៅនឹងស្រីៗពុំប្រើ។
ចំណែកស្ត្រីដែលប្រើសមាសធាតុគីមីជាថ្នាំអ៊ុតសក់ត្រង់ក្នុងកម្រិតច្រើន ជាមធ្យមពី៥-៨សប្តាហ៍/ម្តង រកឃើញថា មានហានិភ័យ ៣០% វិវឌ្ឍទៅរកជំងឺខាងលើនេះ។
ក្រុមអ្នកស្រាវជ្រាវបានពន្យល់ថា សមាសធាតុគីមីក្នុងផលិតផលសម្អាង ឬលាប-អ៊ុតសក់ មានច្រើនជាង ៥,០០០ សមាសធាតុ។ វាអាចជ្រាបទៅក្នុងស្បែកក្បាល ពិសេសក្លិនរបស់វាអាចជ្រាបចូលក្នុងរាងកាយតាមដង្ហើមបាននៅពេលដែលប្រើវា។
ដោយសារមើលឃើញពីផលអវិជ្ជមាននេះ ក្រុមអ្នកស្រាវជ្រាវដែលបានចុះផ្សាយលើព្រឹត្តបត្រសុខភាព International Journal of Cancer របស់សហរដ្ឋអាមេរិក បានណែនាំឱ្យបន្ថយការប្រើប្រាស់ជាញឹកញាប់ ឬចៀសឆ្ងាយពីសមាសធាតុលាបសក់ទាំងនោះ ករណីពុំចាំបាច់។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
អត្ថបទផ្ដល់សិទ្ធិដោយ Hello Krupet