ក្លិបធំចំនួន ៣ ចាប់អារម្មណ៍មកលើកីឡាករឆ្នើមម្នាក់របស់ Barcelona

អង់គ្លេស៖ បើតាមសេចក្ដីរាយការណ៍បានឲ្យដឹងថាក្លិប Manchester United គឺជាក្លិបមួយក្នុងចំណោមក្លិបធំទាំង៣ ដែលចាប់អារម្មណ៍ចង់បានខ្សែបម្រើរបស់ Barcelona កីឡាករ Arturo Vidal នៅទីផ្សារដោះដូរកីឡាករខែមករាខាងមុខ។

អ្នកចាត់ការទូទៅរបស់ Barcelona លោក Ernesto Valverde បាននិងកំពុងធ្វើការរុះរើកីឡាករមួយចំនួននៅកីឡដ្ឋាន Camp Nou ដោយក្នុងនោះ Vidal និង Ivan Rakitic សុទ្ធសឹងជាកីឡាករដែលមានភាគរយខ្ពស់ក្នុងការចាកចេញពីក្លិបមានមូលដ្ឋាននៅតំបន់កាតាឡាន់មួយនេះ។

បើតាមប្រភពពីក្នុងប្រទេសអេស្ប៉ាញ បិសាចក្រហម Man UTD បានដាក់ការចង់បានមកលើខ្សែបម្រើ Vidal នៅទីផ្សារដោះដូរខាងមុខ ខណៈក្លិបធំ២ផ្សេងទៀតដូចជា Paris Saint-Germain និង Inter Milan ក៏ចង់បានខ្សែបម្រើជម្រើសជាតិឈីលីរូបនេះដូចគ្នា។

គួរឲ្យដឹងផងដែរថា Man UTD ក៏ធ្លាប់ទាក់ទងដើម្បីចង់នាំយក Vidal មកកាន់កីឡដ្ឋាន Old Trafford តាំងពីឆ្នាំ២០១៤ ម្ល៉េះ គ្រាដែល Vidal នៅលេងឲ្យក្លិបអាល្លឺម៉ង់ Bayern Munich៕

ប្រភព៖ SportsMole