ខេត្តកណ្ដាល ៖ ជនសង្ស័យ២នាក់បានជិះម៉ូតូ១គ្រឿងឌុបគ្នាដេញតាមធ្វើសកម្មភាពឆក់កាបូបពីស្ត្រីម្នាក់ដែលកំពុងជិះម៉ូតូ១គ្រឿងតែម្នាក់ឯង បណ្ដាលឲ្យស្ត្រីរងគ្រោះដួលម៉ូតូ រងរបួសយ៉ាងដំណំ។ លុះពេលឆក់បានសម្រេចហើយជនសង្ស័យនាំគ្នាជិះម៉ូតូគេចខ្លួនដែរ ប៉ុន្តែចៃដន្យត្រូវបានកម្លាំងនគរវាលស្រុកអង្គស្នួលល្បាតប្រទះឃើញជាក់ស្ដែង ក៏សហការជាមួយកម្លាំងប្រជាការពារដេញតាមឃាត់ខ្លួនបានទាំង២នាក់តែម្ដង។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សហេតុការណ៍ខាងលើនេះបានកើតឡើងកាលពីវេលាម៉ោង៥និង៣០នាទីល្ងាចថ្ងៃទី៥ ខែធ្នូ ឆ្នាំ២០១៩ នៅតាមផ្លូវកៅស៊ូ ស្ថិតនៅក្នុងភូមិព្រៃក្រាយ ឃុំព្រៃពួច ស្រុកអង្គស្នួល ខេត្តកណ្តាល ។
ជនសង្ស័យទាំង២នាក់ខាងលើនេះ ម្នាក់ឈ្មោះសុង ចាន់ថុល ភេទប្រុស អាយុ២៦ឆ្នាំ មុខរបរកម្មករសំណង់ មានទីលំនៅក្នុងភូមិផែថ្ម សង្កាត់ស្រះចក ខណ្ឌដូនពេញ រាជធានីភ្នំពេញ និងម្នាក់ទៀតឈ្មោះគិន ភក្តី ភេទប្រុស អាយុ១៨ឆ្នាំ មុខរបរមិនពិត នៅភូមិស្វាយជ្រុំឃុំព្រែកល្វា ស្រុកខ្សាច់កណ្តាល ខេត្តកណ្តាល។ កម្លាំងនគរបាលខាងលើដកហូតបានម៉ូតូ១គ្រឿងម៉ាកស៊ុយហ្សុ៊យគីឡែត ពណ៌ទឹកមាសលាយស ពាក់ផ្លាកលេខ ភ្នំពេញ ១HY-៤៣៤២ ជាមធ្យោបាយដែលជនសង្ស័យជិះធ្វើសកម្មភាពឆក់។
ចំណែកស្ត្រីរងគ្រោះខាងលើឈ្មោះខែម សូលីម អាយុ២៦ឆ្នាំ មុខរបរលក់ដូរ មានទីលំនៅក្នុងភូមិសល់ដី ឃុំព្រៃពួច ស្រុកអង្គស្នួល ខេត្តកណ្តាល បានរងរបួសរលាត់ជង្គង់ខាងស្តាំ, រលាត់ប្រអប់ដៃទាំងសងខាង, រលាត់ចង្កា និងរលាត់ស្មាខាងឆ្វេង ហើយបាត់បង់កាបូបដៃពណ៌ផ្កាឈូក១ដែលមានលុយចំនួន៣០.០០០រៀលប៉ុណ្ណោះ។
តាមប្រភពព័ត៌មានបានឲ្យដឹងថា មុនពេលកើតហេតុ ស្ត្រីរងគ្រោះបានជិះម៉ូតូពីផ្សារអង្គស្នួលត្រឡប់ទៅផ្ទះវិញ ដោយធ្វើដំណើរក្នុងទិសដៅពីជើងទៅត្បូង ព្រមទាំងមានកាន់កាបូបជាប់នឹងដៃផងដែរ ។ លុះពេលទៅដល់ត្រង់ចំណុចមុខវត្តអង្គសម្ពលី ស្រាប់តែមានជនសង្ស័យចំនួន២នាក់បានជិះម៉ូតូមួយគ្រឿងវ៉ាទៅមុខហើយងាកមកឃើញស្ត្រីរងគ្រោះកាន់កាបូបជាប់នឹងដៃ ហើយពេលជិះហួសបន្តិច ជនសង្ស័យក៏បានបន្ថយល្បឿនម៉ូតូឲ្យស្ត្រីរងគ្រោះបើកម៉ូតូវ៉ាទៅមុខវិញម្តង ។
តាមប្រភពព័ត៌មានបានឱ្យដឹងបន្តថា បន្ទាប់មកជន សង្ស័យបានបើកម៉ូតូតាមពីក្រោយ លុះដល់ទន្ទឹមស្ត្រីរងគ្រោះ ស្រាប់តែជនសង្ស័យម្នាក់ដែលអង្គុយខាងក្រោយបានឆក់កាបូបពីស្ត្រីរងគ្រោះបានសម្រេច បណ្ដាលឲ្យនាងដួលរងរបួសយ៉ាងដំណំតែម្ដង។
តាមប្រភពព័ត៌មានបានឱ្យដឹងបន្តទៀតថា ពេលនោះស្ត្រីរងគ្រោះបានស្រែកឲ្យគេជួយថា«ចោរឆក់កាបូបខ្ញុំហើយ» ។ ស្របពេលនោះកម្លាំងនគរបាលស្រុកអង្គស្នួលកំពុងល្បាតតាមដងផ្លូវនោះបានឃើញសកម្មភាពជាក់ស្ដែង ក៏សហការជាមួយកម្លាំងប្រជាការពារដេញតាមពីក្រោយ រហូតដល់ផ្លូវខ្នងប្រឡាយតាហោ ស្ថិតនៅក្នុងភូមិកណ្តោស ឃុំលំហាច ស្រុកអង្គស្នួល ខេត្តកណ្តាល ទើបចាប់ខ្លួនបានទាំង២នាក់ និងនាំទៅសាកសួរនៅអធិការដ្ឋានគរបាលស្រុកអង្គស្នួល។
ក្រោយពេលសាកសួរ ជនសង្ស័យបានឆ្លើយសារភាពថា ពួកខ្លួនពិតជាបានធ្វើសកម្មភាពឆក់កាបូបពីស្ត្រីរងគ្រោះខាងលើនោះប្រាកដមែន ប៉ុន្តែក្រោយពេលឆក់បាន្ហើយ ដោយសារភ័យនឹងនគរបាលដេញតាម ទើបបោះកាបូបនោះចោលវិញ ហើយពុំដឹងថានរណារើសយកបន្តទៀតឡើយ៕
ប្រភព៖ កោះសន្តិភាព