រាជធានីភ្នំពេញ ៖ តាមសេចក្តីរាយការណ៍បឋមបានឱ្យដឹងថា នាព្រឹកថ្ងៃទី៦ ធ្នូ ឆ្នាំ២០១៩ នគរបាលប្រឆាំងបទល្មើសសេដ្ឋកិច្ចក្រសួងមហាផ្ទៃបានរៀបចំដុតកម្ទេចផលិតផលក្លែងក្លាយចំនួន១២មុខ សរុបមានទម្ងន់ប្រមាណជាង១០០តោន ក្នុងនោះរួមមាន សម្បកកញ្ចប់បារីគ្រប់ប្រភេទ, សម្បកសុងបារីចម្រុះ, បារីចម្រុះម៉ាក, សរសៃថ្នាំជក់, ឧបករណ៍សម្ភារបម្រើឱ្យការផលិតបារី, ផលិតផលគ្រឿងសំអាងគ្រប់ប្រភេទ, ឧបករណ៍សម្ភារបម្រើឱ្យការផលិតគ្រឿងសំអាង, ផលិតផលធូប និងធូបមូស ។ ខណៈនេះកំពុងរៀបចំកាយរណ្តៅដើម្បីធ្វើការដុតកម្ទេចចោលផងដែរ ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សតាមសេចក្តីរាយការណ៍បានឱ្យដឹងថា ទីតាំងរៀបចំដុតកម្ទេចផលិតផលក្លែងក្លាយខាងលើនេះបានធ្វើឡើងនៅភូមិសំរោងទាវ សង្កាត់ក្រាំងធ្នង់ ខណ្ឌសែនសុខ ក្រោមអធិបតីភាពរបស់លោកសន្តិបណ្ឌិត តេង សាវង្ស រដ្ឋលេខាធិការក្រសួងមហាផ្ទៃ ។
តាមសេចក្តីរាយការណ៍បានឱ្យដឹងបន្តថា កន្លងមកនាយកដ្ឋាននគរបាលប្រឆាំងបទល្មើសសេដ្ឋកិច្ចបានធ្វើការដុតបំផ្លាញចោលនូវវត្ថុតាងចាប់យកក្លែងក្លាយ ហើយក៏ជាលើកទី៣២ហើយ ដែលនាយកដ្ឋាននគរបាលប្រឆាំងបទល្មើសសេដ្ឋកិច្ចបានធ្វើការដុតបំផ្លាញចោលវត្ថុតាងក្លែងក្លាយចំនួន១២មុខខាងលើនេះ ដែលមានទម្ងន់សរុបប្រមាណជាង១០០តោន ។
តាមសេចក្តីរាយការណ៍បានឱ្យដឹងបន្តទៀតថា កិច្ចសហប្រតិបត្តិការបង្ក្រាបបទល្មើស និងវត្ថុល្មើសច្បាប់ដែលបានចាប់យកមកដុតបំផ្លាញចោលដូចបានរៀបរាប់ខាងលើនេះ ដោយអនុវត្តតាមអនុសាសន៍ដ៏ខ្ពង់ខ្ពស់របស់សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងមានការដឹកនាំបញ្ជាផ្ទាល់ពីលោកនាយឧត្តមសេនីយ៍ នេត សាវឿន អគ្គស្នងការនគរបាលជាតិ និងមានការសម្របសម្រួលពីលោកព្រះរាជអាជ្ញាអមសាលាដំបូងរាជធានីភ្នំពេញ និងខេត្តកណ្តាល និងមានការចូលរួមពីសមត្ថកិច្ចជំនាញពាក់ព័ន្ធ និងអាជ្ញាធរមូលដ្ឋាន បានធ្វើឱ្យនាយកដ្ឋាននគរបាលប្រឆាំងបទល្មើសសេដ្ឋកិច្ច អនុវត្តភារកិច្ចរបស់ខ្លួនទទួលបានជោគជ័យ ។
ទន្ទឹមនឹងនេះដែរ លោកឧត្តមសេនីយ៍ឯក ចាន់ វ៉ាន់ធឿន បានសំណូមពរដល់អង្គភាព និងស្ថាប័នជំនាញពាក់ព័ន្ធទាំងអស់បន្តចូលរួមសហការឱ្យកាន់តែមានប្រសិទ្ធភាពខ្ពស់បន្ថែមទៀត ហើយជាងនេះ លោកក៏សំណូមពរដល់ប្រជាពលរដ្ឋឱ្យមានការប្រុងប្រយ័ត្នចំពោះផលិតផលក្លែង និងចូលរួមសហការផ្តល់ព័ត៌មានជូនសមត្ថកិច្ចក្នុងករណីពិនិត្យសង្ស័យឃើញថា មានទីតាំងផលិតផលផ្សេងៗដែលខុសច្បាប់ ដើម្បីចូលរួមទប់ស្កាត់ និងការពារសុខុមាលភាពជូនប្រជាពលរដ្ឋ ។ ព័ត៌មានលម្អិតនឹងមានផ្សាយនៅលើទំព័រកាសែតកោះសន្តិភាព ៕
ប្រភព៖ កោះសន្តិភាព